Uzye Mukuipekanya Uku Ciusyo?

Pa Nisani 13 mu 33 C.E. Yesu wamanyile ukuti wasiile sile nu wanda onga uwa kuya pamwi na asambi yakwe. Pa wanda kwene uu amanguzi wali nu kuzevya Ucilo wa kusyalikizyako pamwi nayo, nu kutandika ukuzevya ukupya ukwa Cakulya ca Manguzi Ica Mwene. Ukuzevya kwene kuu ukucindame cuze kwalondekwanga ukupekanya ningo. Acino fwandi Yesu watumile Petulo na Yoane ukuyapekanya ningo ivintu. (Luka 22:7-13) Kufuma sile lili kwene, cila mwaka pakuti Aina Klistu yazevye ningo iciusyo ca mfwa yako Yesu yakatandikilapo ukupekanya. (Luka 22:19) I vyani vino tulinzile ukucita pakuti tupekanye uku Ciusyo icilayako pa 3 Epulelo?

Vino ya Eluda Yalinzile Ukupekanya:

Mulinzile ukupekanya ningo pakuti muce muomvye Ing’anda ya Wene nanti cikulwa cuze icisuma. Muno mulalonganila mufwile ukuya uluswepo lulinge, na pakwikala apasuma, napya mulinzile ukuya umuza. Nupya mufwile ukupekanya ningo pakuti mukazifizye limwi pano mulalonganila.
Mulinzile ukusoolola kalanda umulinge, ceyamani, alino na ina aalapepa pa vinkolanya.
Ndi cakuti ivilongano viili nanti kucilapo vilaomvya icifulo conga, mulinzile ukulanzyanya ningo pa nsita ya kutandika ukulongana ni vya kucita lino yamwi yakwingila na yauze yakufuma alino na kuno mulaimikila ya motoka nanti majinga.
Mulinzile ukusoolola aalaya ya kazwa, na aalaapisyamo ivinkolanya, nu kuyalangilila vino yalaomba.
Muce mupekanye ningo ivinkolanya, imbale, matambula yako waini, itebulo ililinge, ni nsalu ya kuvimba pi tebulo.

Vino ya Kasimikila Yalinzile Ukupekanya:

Mukaipekanye ningo pakuti mukaombesye ukwamako antu ku Ciusyo.
Mukalembe mazina ya antu yano mukasambilizya Baibo, ya lupwa, yano mukasambilila nayo ku sukulu, yano mukaomba nayo, na antu sile yauze, aakuti muce mwame.
Muce mwawelenga nu kwelenganyapo sana pa malembelo yano tukawelenga umu nsita ya Ciusyo.
Mukaipekanye ukupokelela aenyi aalaiza uku Ciusyo.