Vya Kusimikila Ukuomvya ya Tebulo Nanti Tusitandi

Ukuomvya ya tebulo nanti tusitandi pa kusimikila, kukulenga antu aingi ukumanya icumi. (Yoane 6:44) Kansi ya eluda yayakomelezya ukuti yangatantika ningo pakuti ya kasimikila yaombela ku ncende ukukazanwa antu aingi mu cifulo cino icilongano cikasimikilamo. Vino tusitandi nanti matebulo visivyakuya pa ncende ili-imwi, fwandi citanga cilondekwe nu kulenga ulusa uku uteeko. Aaweni aalinzile ukuomba umulimo kwene uu? Aa kasimikila akapingulapo ningo, aa miyele isuma, nupya aamanya ningo ukusimikila. Lekini tulande pali vino mulinzile ukucita navino mutalinzile ukucita pakuti muombe ningo.

Vino Mulinzile Ukucita:

Mufwile ukuya ansansa nupya mufwile ukuitemelwa ukwazwa antu yonsi akupita pano imutantika impapulo. Ya kasimikila yamwi yakamwentula alino nu kulamuka ni nsansa antu akupita. Ndi cakuti umwi walolekesya pano imutantika impapulo, limwi mungalanda muti: “Izini mutolepo ulupapulo ndi cakuti mungatemwa.”
Mufwile ukwimililako mupipi na pano imutantika impapulo. Umu ncende zimwi ya kasimikila yakaomba ningo ndi cakuti iyimilila umupipi na pano iyatantika impapulo. Ya kasimikila yauze nayo yakalola ukuti inzila yii ikalenga antu akupita ukuvwa insonyi izyakupalama pano iyatantika impapulo, acino fwandi yakasoololapo ukwimilila katalamukila pakuti iyalolela umuntu ayapalama pano iyatantika impapulo. Lino umuntu wiyo wapalama mungatandika ukulanzyanya nawe, limwi mungamuzya muti: “Uzye mwatala mwelenganyapo api uzyo lii?”
Mufwile ukuomvya Baibo lyonsi.
Ndi cakuti umwi watoolapo ulupapulo luno tukaomvya pakusambilizya antu Baibo, ivili wakwe Vino Baibo Ikasambilizya, mufwile ukumulondolwela vino tukacita pakusambilila. Mungamutambisyako na kavidyo kakuti U Mulandu ci Uno Mulinzile Ukusambilila Baibo? ukuomvya akaombelo kali konsi kano mukatambisizyapo.
Mungapokako manambala yakwe foni nanti ama adelesi kuli yonsi akulonda ukusambilila. Ndi cakuti umuntu wiyo asyaikala mu cifulo cinu, lyene mungalemba pali foomu iyakuti Mukwai Mulondini Wii (S-43), ndi mwalemba foomu yiyo mungaya mukapeele zuwazuwa kalemba.