Vyakwiusya pa Ukongano mu 2015
Vino Insita Itantikwe: Antu yalaatandika ukwingila umwakulonganila ni nsita yako 7:00. Inyimbo zya kutandikilako pulogalamu zilaatandika pa 8:20 pa manda yonsi yatatu. Inyimbo ndi zyatandika, fwensi kwene tulaalondekwa ukwikala pakuti ukulongana kukaatandika umu mucinzi kwaula cimvulunganya. Kulongana kulaasila ku ma 16:00 pa wanda wa kutandikilako na wakwe ciili. Lyene pa wanda wakwe citatu kulasila ku ma 15:00.
‘Kulumbanya Yeova mu Lwimbo’: Antu yakwe Yeova aku mpiti yalumbanyanga Yeova mu nyimbo, nupya na ndakai kwene inyimbo zyacindama sana mu kupepa kwa cumi. (Masa. 28:7) Cila ciputulwa ca ukongano cikatandika ni nyimbo. Inyimbo zii zitaelako uku kutusansamusya sile lino tukucita vyuze, lelo zyapekanyiziwa pakuti tungasambilila pali Yeova nu kumupepa. Fwandi lino ceyamani walanda ukuti inyimbo iizyatandika kulila, asi insita ya kusimika ilyasi lelo insita yakwikala umu vilimba nu kukutikako, ndi twacita vivyo ale tukulanga ukuti tukataizya wakwe cimwi pa nyimbo zii. Nupya ala tukulanga nu kuti tukataizya uku ina na ya nkazi pali vino yakaombesya pa kulizya inyimbo zii. Aina na ya nkazi yaa, yakapita imiku ili umu mwaka ukuya uku Patterson, New York ukuomvya impiya zyao pakuti sile yakalizye inyimbo izisuma izyakuti twaipakizya. Acino pa cisila ca kukutika inyimbo zii, swensi kwene tulinzile ukwimbila pamwi inyimbo zya Wene pakuti tulumbanye Yeova.
Kwakwimika Majinga na Yamotoka: Ku vifulo vya ukongano kukaya apakwimika majinga na yamotoka, incende ilapekaniziwa apaakuti aliwensi angaya akimikepo injinga nanti motoka. Ilingi incende iyo ikaaya inono, fwandi akwata ya motoka aingi cingazipa yaomya sile yonga nanti yaili. Mukwai mulinzile ukukonka vino aakulangilila ivya kwimika yamotoka na majinga yakumunena.
Kusunga Paakwikala: Cila katondo pakuya umwakulonganila, mukwai, twapaapata, kusi kusimwilila incende pa kwikala ngati mukulwila. Nga tuli nu mwenzo wa kuipeelesya, kulikuti ukuleka kuti cazipila yauze, cikalanga ukuti sweswe Ina Klistu ya cumi, nupya antu aakutulola yakalumbanya Leza. (Yoa. 13:34, 35; 1 Kol. 13:5; 1 Pet. 2:12) Yano mungasungilako sile apaakwikala, ayaaya yano mukaikala nayo apa ng’anda, yano mwiza nayo, nanti yaayo yano mukasambilizya Baibo. Mwalangulukilako yauze ndi cakuti mukuomvya ya ambulela nanti icili consi cakucinga kasanya. Mwasoolola apalinge pano mutanga mucinge auzo. Mulinzile ukuyuzya mweineco muti: ‘Uzye vino nkucita vimalenga yauze yataalola ivikucitika uku nkoleelo nu kukana-ipakizya ukongano?’ Akoloci na alwalilila nanti alemale aakalondekwa ukuyasakamala, yene yakayasungila incende pano yafwile ukwikala. Incende iiyo itaakula sana, fwandi umuntu wenga sile nanti yaili akusakamala antu yaayo aliyo yafwile ukuyaikala nayo apa ncende kwene iiyo.
Imizwalile: Mizwalile itu lino tuli pa kulongana ilinzile ukuya ilinge nupya iya mucinzi, italinzile ukuya wa mizwalile ino antu aa mu nsi yakuzwala ndakai. (1 Tim. 2:9) Lino tukupuza nanti ukutandala pacisila ca kulongana, nanti lino tutatala twatandika ukulongana, nalyo kwene tulinzile ukuisakamala umu mizwalile. Ndi cakuti imizwalile itu ili ningo cilatwangukila ukusimikila uku yantu, nupya tutalauvwa ni nsonyi zyakuzwala baji. Milolekele itu ni miyele itu isuma lino tulalongana italalenga sile ukuti antu yatandike ukusambilila Baibo pakuti yakapusuke lelo ilaleta nu luzango kuli Yeova.—Zefa. 3: 17.
Ivyakuomvya Amafoni na ya Kamela: Tukalangilila ukuti tukuomvya ningo ivintu vii ndi cakuti visikupumvyanya yauze. Ndi cakuti tukuomvya kamela, akakukopelako vidyo, tabuleti, nanti sile akaombelo kauze tuce twaviomvya ningo ukwaula ukupumvyanya antu nanti sile uku yacinga. Nupya tulalanga ukuti twaya ni miyele isuma ngi cakuti tusikutumila antu ma meseji lino tukulongana.
Luwatizyo: Tutafwile ukulola kwati apakucitikila uluwatizyo ali pakukopelwa mapikica. Yonsi akutamba uluwatizyo yalinzile ukwimilila katalamukila, ukwaula icimvulunganya nupya umu mucinzi. Avyazi yalinzile ukusakamala ana yao, yatalinzile ukuyaleka yaya yonga ukwa kuwatiziwilwa.
Vyakulya Vya Musanya: Mukwai mukaiza ni vyakulya ivyanguke ukucila mukaafuma pa cifulo ca kulonganilapo imuya uku kulonda ivyakulya kuze pa nsita ya kupuuza. Mungasendela ivyakulya umu kacola nanti akalikonsi akakusendelamo akanono kano mungika mupipi na pano imwikala nanti mwisika ya cilimba. Ukusendela ivyakulya mu viya vya magalasi kutazumiliziwa pa ukongano. Ngi cakuti ivyakulya vimwi vyasyala, nanti kuli vino mukulonda ukusumba, mulinzile ukuvisunga pakuti muye muvisumbile uku ng’anda ngapano mukulonganila pasi imbu.
Misangulo: Pa kulangizya vino tukataizya pa maukongano, tungasangwilako impiya ku kutungilila umulimo wa mu nsi yonsi lino tuli pa ukongano kwene. Nga mukulonda ukusangwilako ukuomvya ceeke, mufwile ukulembapo ukuti impiya zifwile ukuya kuli: “Watchtower Society.”
Milembo: Ndi cakuti mukalwalilila, alino kwaya imilembo iiyele ino ya dokota yamunena ukuomvya, muce mwasenda, pano apa ukongano patalaya ukupeela imilembo iyo. Insindano ni vituwo vya nsindano, vifwile ukusumbwa ningo pakuti vitaleesile uzanzo, mutafwile ukuvisumbila umu viya vya vikoona ivili pa cifulo ca ukongano.
Kucingilila Uzanzo: Mukwai muce mwaiusya lyonsi ukuicingilila ku mazanzo akacitika pa mulandu wa kusyetuka nanti kupumika. Cila mwaka kukaaya mazanzo aakaiza pa mulandu ni nsapato zino umwi azwite, sana-sana insapato izitali. Cingazipa ukuzwala insapato izilinge, pakuti mwatampula ningo lino mukupita. Avyazi yalinzile ukusakamala ana yao pakuti yatacisika, nanti ukuleka yauze ukucisika. Ndi cakuti umwana akucita ivyacicitecite, yalinzile ukumusalapula.
Twakukunkulusizyamo Ana ni Mipando ya Kupuzilapo: Utwakukunkulusizyamo ana ni mipando ya kupuzilapo vyazumiliziwa sile mu vifulo vya kulonganilamo vino yatapangilamo limwi vyakwikalapo. Lelo, utulimba twa yana utunono tuno mungika apiipi na pano muli, twene twazumiliziwa mu vifulo vya kulonganilamo ivili vyonsi.
Mafuta Acinunu Sana: Tungalanga ukuti twatemwa anji nga tukucefyanya ya pefyumu na mafuta ya cinunu cikali, angalenga yauze ukutandika ukukoola nu kutisya nanti sile ukuta ukufuuta ningo.—1 Kol. 10:24.
Foomu Wakuti Mukwai Mulondini Wii (S-43): Muce mwaomvya foomu wakuti Mukwai Mulondini Wii, ndi cakuti lino mukuomba unte wa mulyasi pa ukongano mwazana aakulondesya ukusambilila Baibo. Ndi mwalembamo muli foomu wiyo, mufwile ukutwala ukwi Ofesi lya Mabuku nanti ndi mwaca mwaswilila uku cilongano, mungaya mukapeele kalemba.
Mu Malesitalanti, mu Masitolo Nanti Ukuli Konsi: Lino muli umu malesitalanti nanti mu masitolo mwaya ni miyele isuma ikacindika izina lyakwe Yeova. Mwateeka umwenzo nupya mwaya nu mucinzi lino mukukwela ya motoka, lino mukupisya ya motoka na majinga, nanti sile lino mukupita umu tuzila. Nupya mulinzile ukuzwala ivyakuzwala ivya mucinzi, vikulanga ukuti mwemwe ya kasimikila.
Mulimo wa Kuitemelwa: Yonsi aakulonda ukuombako imilimo pa ukongano, yafwile ukuya ukwi Ofesi lya Mulimo wa Kuitemelwa. Ana aatatala yafisya imyaka 16 nayo kwene yangaombako ndi cakuti avyazi yao, nanti yayo akayasunga yazumilizya.