Kuomba Ningo Umu Mulimo—Kusimikila Umu Cifulo Cino Antu Yakaombelamo Incito

Cino Cacindamila: Pa mulandu wakuti antu aingi yakasumba insita ikulu uku ncito yao, fwandi ilingi pakuti tuyasimikile ilandwe lya Wene, cingaziipa sana ukuya pa ncende kwene ino yakaombelapo. Tungaipakizya sana ukusimikila umu cifulo cino antu yakaombelamo, pano tukayazana ukucila uku mang’anda yao nupya aomvi yakaikako sana mano uku yantu aakuyapo, pano yakayalola kwati pali vimwi vino yakulonda ukukala. Fwandi ya kasimikila pakuti yaombe ningo, yalinzile ukuya acenjele nupya yafwile ukupingulapo ningo, alino imizwalile nu kuiyemvya navyo vifwile ukuya ivilinge. (2 Kol. 6:⁠3) Acino umwangalizi wa mulimo afwile ukwikisyako sana mano pakuti amanye imiku ino icifulo cico cikaombelwamo nu kumanya aakaombelamo.

Vya Kucita:

Mwapekanya amazwi aakulanda aipi. Ndi cakuti tukusumba sana insita ikulu ukulanda nu muomvi aakuomba, limwi cingalenga ukuti umuku uze akakane ukutuzumilizya ukumusimikila.
Mwasoolola ukuyako pa nsita ino aakuomba yatapamviwe sana, limwi cingazipa ukuyako lino yacitandika sile ukukazya.
Inkoleelo mwaezya ukulanda nu muntu akwangalila incito. Mwaya aansansa nupya mutaifinya. Limwi mungalanda muti, “Tukutandalila antu pa kasita sile kanono pa ncende ino yakaombelapo, pano ndakai icitale pakuti uzane umuntu pa ng’anda.” Lyene mungalanda nawe amazwi anono sile, nupya mungamupeelako na kapepala kilandwe, ya magazini, nanti lupapulo luze. Pakuti citaloleka kwati tukulonda ulupiya kuli wino akuomba, cingaziipa ukukanalanda pa musangulo suka sile ndi cakuti yatuuzya vino tukazana impiya izikaazwilizya umulimo witu.
Ndi cakuti umuntu akwangalila incito u wa nsansa, mungamuuzya ngi cakuti angamuzumilizya ukulandako na aomvi na yauze aakuomba. Umu vifulo vimwi vino antu yakaombelamo incito, limwi cingaziipa nu kuuzya ndi cakuti mungasyako impapulo izya kuwelenga umu muputule uno yakalilamo nanti ukupuzila.
Mwapingulapo ningo nupya mwaaluka-aluka. Ndi cakuti umuomvi akulanda nu muntu nanti limwi atapamviwa, cingaziipa ukulolela amale vino akucita nga lino mutandike ukulanda nawe.

Mwezi Uu Muce Mwezye Ukucita Vii:

Lino muli pa Kupepa Kwa Lupwa, muce mucite icilangililo pali vino mungaomvya amazwi aipi ndi cakuti mukusimikila umu cifulo cino antu yakaombelamo incito.