Mwakolanya Utailo Wao
1. I buku ci lino tulatandika ukusambilila pi Sambililo Lya Baibo pa Cilongano ukutandika umulungu wakwe 19 Okotoba?
1 Ukutandika umulungu wakwe 19 Okotoba, 2015, api Sambililo Lya Baibo pa Cilongano, tulatandika ukusambilila ibuku lya Ciyemba ilyakuti, Pashanyeni Icitetekelo Cabo. Umwibuku lii mwaya malyasi aalembwa muli Baibo aakalanda pa yantu 14, aonsi na anaci autailo. Cino malyasi yayo yalembelwa umwibuku lii, a pakuti twaelenganyapo sana pa yantu kwene yayo nu kusininkizya ukuti fwandi antu yaayo akuno yali nupya yakwatanga ni ntazi lino yaombelanga Yeova. Ibuku lii lyalembwa umu musango uwakuti twasambililako uku malyasi kwene yaa.—Ayeb. 6:12.
2. Londololiniko vimwi-vimwi ivyaya umwibuku ilyakuti, Mwakolanya Utailo Wao.
2 Ivyeo Ivilimo: Umwibuku kwene lii muli na mapu ikutwavwa ukumanya incende kuno umuntu wino iyalumbula umu cipande wikalanga alino ni nsita ino waliko. Nupya icipande conga na conga icikwata kamutwe akakuti, “Mauzyo Akwelenganyapo . . . ,” ivyeo vivyo vilatwavwa ukwelenganyapo sana pa malyasi yano tukusambililapo alino na vino tungaomvya ivyeo vino twasambilila umu cipande cico. Nupya ibuku lii likuloleka iliyembe ningo, ivyeo ivilondololwa ningo sana, nupya muli ni vikope ivimatwavwanga ukwelenganyapo sana pa malyasi aalimo.
3. I vyani vino tungacita pakuti vino tukusambilila umwibuku lii vyatwavwa?
3 Vino Mungacita Pakuti Ivili Umwibuku Lii Vyamwavwa: Kalata iitandikilepo umwibuku lii ukufuma Ukwiumba Ilikatungulula, muli amazwi aakutukomelezya aakuti: “Mwaelenganyapo sana nu kwikako mano ku malyasi alemvilwe umwibuku. Mwaezya ukuyuvwa wakwe vino antu yayo aalembwa muli Baibo yuvwanga, nu kulola ivintu ndi vino yene yavilolanga. Mwalinganya vino yacitanga lino yakwatanga intazi kuli vino namwe mungacita ndi cakuti mwemwe intazi zizyo zyacitikile.” Ndi tukwelenganya sana apa malyasi aalembwa muli Baibo tulamanya vino ilyasi lilyo likulandapo alino na antu ali umwilyasi kwene lilyo. Acino ukwelenganya sana kwapusana nu kutunganya sile. Fwandi pakuti twaelenganya sana tufwile ukukwata insita. (Neem. 8:8) Ndi cakuti mukutandikila pano mwasiikizye ukusambilila icipande, lyene katungulula alinzile ukuomvya masekondi 30 nanti 60 uku kupituluka panono umu vyeo vino mwasambilile umulungu uwafumako. Ndi cakuti icipande cino mukusambilila citakweti kamutwe kakuti, “Mauzyo Akwelenganyapo . . . “ pa kumalilila ukusambilila, katungulula angapanga iuzyo lyonga nanti yaili aakupituluka muli vino imusambilila.
4. U mulandu ci uno tufwile ukusambilila ibuku lyakuti Mwakolanya Utailo Wao?
4 Umu nsi ii, mwaya antu aakaomvya inzila izipusane-pusane pakuti yonoone utailo witu nanti ukututovola. Ibuku lii alino ni vipande ivikaya umu Lupungu Lwa Mulinzi muno ivyeo kwene ivili umwibuku lii vyafuma, u wila ukufuma kuli Yeova, nupya vimatwavwanga ukukomya utailo witu. (Yako. 1:17) Fwandi lekini twaomvya sana ibuku lii, twazanwa lyonsi ukwi Sambililo Lya Baibo pa Cilongano alino nu kwasukapo sana lino tukusambilila!