Kuomba Ningo Umu Mulimo—Mwa-avwa Asambi Inu Pakuti Isambililo Lyaziipa

Cino Cacindamila: Pakuti asambi yaalunduluka muli ukapepa, yatafwile sile ukupelela pa kumanya masambililo akutandikilako aya Umwizwi Lyakwe Leza. (Ayeb. 5:⁠12–6:⁠1) Pakuti tusambilile tulinzile ukuombesya. Tufwile ukulinganya ivyeo vino tukusambilila kuli vino twamanya mpiti alino nu kumanya vino ivyeo vivyo vingatwavwa. (Mapi. 2:1-6) Ndi cakuti asambi yamanya vino yangaalondelezya ivyeo, cilalenga ukuti yaomvya impapulo zitu pa kwasuka amauzyo amuli Baibo. Fwandi ukutwalilila ukucita vino yakusambilila kulayavwa ukuti yaye azyansye uku ntazi izikacitikila Aina Klistu.—Luka 6:47, 48.

Vya Kucita:

Mwayalondolwela sana mulandu uno cacindamila ukupepa kuli Yeova lyonsi lino mukusambilila nayo.—Yoa. 14:26; 1 Kol. 2:10.
Lino mwatandika sile ukusambilila nu musambi, mwamukomelezya ukuti apekanyizizya calimwi vino mulasambilila nawe. Mwamulangako ibuku linu, nupya mwamusambilizya vino angasila apali icasuko nanti ukulemba icisinka icili umwisambililo.
Mwa-avwa umusambi pakuti lino akwasuka atawelenga sile amasuko. Isambililo litafwile ukuya kwati tukuuzya sile umusambi mauzyo alino nawe akuwelenga sile amasuko alembelwa limwi.
Mwakomelezya umusambi winu ukuwelenga Baibo cila-wanda. Mwamulangako utantiko uwakuwelenga Baibo uwaya pa jw.org, nanti uwaya umu Lupungu lwakwe Ogasiti 1, 2009, pifwa 15, ungamwavwa pakuti camwangupalila ukuwelenga Baibo. Fwandi pakuti umuntu aawelenga Baibo cila-wanda afwile ukuipeelesya sana, lelo ukuya nu mute kulalenga ukuti aye ni nsansa.—Masa. 1:2, 3.
Mwalanga umusambi winu vino angaomvya laibulale ya pa kompyuta iya mpapulo ziitu nanti LAIBULALE IYA PA INTANETI nanti Ibuku Ilya Kwazwa Inte Zyakwe Yeova Ukulondelezya Ivyeo, ku kuzana masuko uku mauzya amuli Baibo. Mwamwavwa ukumanya ivimanyililo vya mazina ya mpapulo zitu izikaomviwa sana pa kulongana.

Mwezi Uu Muce Mwezye Ukucita Vii:

Lino mwamala ukusambilila pa kamutwe nanti icipande, muce muuzye umusambi winu alondolole panono vino wasambilila umwisambililo lilyo. Ndi cakuti mutakwata umusambi, muce mwezye ukulondololako mu mazwi anono vino mwawelenga muli Baibo nanti muli palagalafu imwi umu Lupungu Lwa Mulinzi pakuti mukamanye ndi cakuti imuvwikisya vino mukuwelenga.