11 Kuombesya

VINO CIKAPILIULA

Antu yano yakaombesya, yasitiina incito. Lelo yakaombesya pakuti yaisakamala muli vino yakulondekwa nu kwazwako yauze, nanti cakuti incito ino yakaomba yasuulwa.

CINO CACINDAMILA

Ndi cakuti tukaombesya nanti foo, umu umi mwaya ivingi ivyakucita. Umu nsi muno antu aingi yatatemwa kuombesya, nga mukuombesya mungaipakizya ivisuma.—Kasambilizya 3:13.

“Nazanyile ukuti ndi cakuti ukuombesya, ungakwata ni cilumba nupya ungaipakizya mu umi. Ukuyuvwa ukuti nga nkuombesya ningaipakizya, kwalenga natemwa sana incito. Nupya ndi cakuti ukuombesya, ungacindikwa nu ku yantu.”—Reyon.

CISINTE CA MULI BAIBO: “Ukuombesya kukawezezya umuzano pee.”—Mapinda 14:23.

VINO UNGACITA

Ungaipakizya ukuombesya ndi walondela vii apisika.

Uwalondesya ukusambilila kuomba ningo ivintu. Ngu kuomba milimo ya pa ng’anda, kulemba vino iyamipeela ku sukulu, nanti milimo yuze, waya ni nsansa. Ndi cakuti wamanya kuomba incito imwi, walola inzila zino ungaombelamo zuwa incito iyo kwaula kulengela. Nga welezya incito iyo, ulaipakizya kuiomba.

CISINTE CA MULI BAIBO: “Ndi cakuti wemo walola penepo umuntu umwi umucincile umu milimo, wiyo kwene ali wino alinzile ukuombela yamwene, asi wakuombela antu asilesile foo.”—Mapinda 22:29.

Waelenganya pali yauze. Insita zingi ndi cakuti ukuomba ningo milimo ino wapeelwa, yauze ala yakuzangilamo. Vikwene avino caya nu mulupwa, ndi cakuti ukuombesya, ala ukwangusizyako yauze icisendo.

CISINTE CA MULI BAIBO: “Mukupeela mwaya upolelelo ukulu cuze kuluta mukupokelela.” —Milimo 20:35.

Waombesya. Ukuluta sile ukuomba panono, waezya kuombesya kucila pano yakupeezile. Ndi cakuti ukucita vii ala ukuikanya, pano ala ukuomba mukuitemelwa ukwaula kupatikiziwa.—Mateo 5:41.

CISINTE CA MULI BAIBO: “Ningatemwa ukuti wemwisikulu ungazwe kwaula kupatikiziwa. Caleka ntalacita cintu cili consi suka inkolelo utale unzumilizye.”—Filimoni 14.

Watantika ningo imiombele. Antu akaombesya yataya nu ukasu nupya yasiomba sile umulimo onga pa nsita itali. Nupya antu akatantika ningo imilimo yakaipakizya cuze ndi yakuomba, na lino yakupuuza kwene.

CISINTE CA MULI BAIBO: “Cingazipa ukukwata tunono ukwaula masakamika, kuluta kuivunola ukwaula muzano, umu kwezya ukuzinganya umuza.”—Kasambilizya 4:6.