Kusunda Ukukalenga Tuye nu Upalilo
Leza walaya ukuti likwene sile wasya azifye ivintu. Alafumyapo vyonsi ivikalenga ukuti twacula nupya alalenga ukuti antu yaikala umi usuma pano nsi. (Masamu 37:11) U mulandu ci uno tungatailila ulayo uu? A pa mulandu wakuti “Leza asi umuntu uwakuti angatumpoka.” (Mpendwa 23:19) Lolini ivintu vimwi visuma vino Kaumba alacita.
Leza Alafumyapo Aipe
“Antu aipe nanti yangavula uli wi sote, ni ntalanganyi nazyo nanti zingasyuka uli, awe yene yonsi yalalowelela pyu.”—MASAMU 92:7.
Wakwe vino itusambilila umu cipande icafumako, iviipe vikuya vikuvulilako sile. Cii citalinzile ukutuzungusya. Alino Baibo yasoowile pali 2 Timoti 3:1-5 ukuti “umu manda yakusyalikizya” antu yalaya aipe sana. Manda yakusyalikizya yakwe vyani? A manda yakusyalikizya aa nsi ii iipe umwaya antu asilonda ukuvwila Leza. Likwene sile Leza ali nu konona antu yonsi aasilonda ukuta ukucita iviipe. Lyene, antu asuma sile akauvwila Leza aliwo yalikala pano nsi. “Antu aololoke yalikala umutende umu mpanga, nu kuipyana umuyayaya.”—Masamu 37:29.
Leza Alonona Satana
‘Leza aakapeela umutende wasya asyunole Satana.’—LOMA 16:20.
Ndi cakuti Satana, iviwa, na antu aipe yonsi yononwa, pano nsi palaya umutende. Kaumba witu watulaya ukuti: ‘Kusi nanti aumwi alatutiinya.’—Mika 4:4.
Leza Alafumyapo Ukulwala ni Imfwa
“Itenti lyakwe Leza lili pamwi na antu . . . Nupya alayakumbula aminsozi yonsi, kutalaya imfwa, kutalaya ukuloosya nanti ukulila nanti ukuvwa ukuwaika.”—KUSOKOLOLA 21:3, 4.
Kucula nu kulwala vilafumiziwapo, pano Leza alafumyapo iviipe vyonsi vino Satana, Adamu, Eva, nu kukanamalilika kwitu vyaleta. Ni cilacitika icakuti “kutalaya imfwa.” Antu aatemwa Kaumba nupya aakamuvwila yalikala manda pe. Nomba, uzye aekwi kuno yalikala?
Kaumba Witu Alalenga Insi Ukuya Paladaise
“Ulwanga lulazanga, na maluwa yalawalula umu mpanga ilangoke.”—EZAYA 35:1.
Lino Leza alafumyapo iviipe, alalenga insi ukuya Paladaise. Kulaya incende izingi izisuma ukwa kutandala, ivyalo, alino ni vyakulya ivingi. (Masamu 72:16) Viyemba, ya yemba, alino ni nguzi vilaya ivisuma nupya mulaya ivya umi ivingi. Nupya antu yatalaiusya nu kuti insi yali ikowele. Antu yalaikala umu mang’anda yao kwene yano yalaikuulila. Nupya kutalaya nanti aumwi aatalakwata ing’anda, kuvwa inzala, nanti ukuya umupiina.—Ezaya 65:21, 22.
Leza Alatuutulula Antu Afwa
“Kulaya ukutuutuluka.”—MILIMO 24:15.
Uzye mungatemwa ukucalola atemwikwa inu afwa? Leza uwa maka yonsi alayapeela umi nupya, nanti ukuyatuutulula umu Paladaise pano nsi. Mulayamanya, nupya nayo kwene yalamimanya. Elenganyini pali vino mulatemwa, na vino nayo kwene yalatemwa! U mulandu ci uno tungasinkizizya ukuti vii vilacitika? Pano muli Baibo mwaya malyasi aakalanda pa ikolo na ance aatuutulwilwe, nupya iyatandika nu kuya pamwi ni indupwa zyao. Nupya Yesu watuutulanga afwe ala na antu aingi yakulolako.—Luka 8:49-56; Yoani 11:11-14, 38-44