1 | MUNO NSI Mwacingilila Uumi Winu

UMULANDU UNO CACINDAMILA

Mazanzo aakacitika yakalenga itukwata intazi umu nzila izipusanepusane.

• Ndi cakuti kwacitika ivintu ivipisye, cikalenga antu ukusakamikwa, nupya antu aakatwalilila ukusakamikwa pa nsita itali cikalenga ukuti yalwalilila.

• Intazi zimwi, zikalenga catalila aomvi ya mu vipatala ukusakamala alwale aingi pa nsita ili imwi pano imilembo ingacepa.

• Intazi zyuze nazyo zikalenga antu ukuulizya impiya, na cii cikalenga cayatalila ukukala ivintu vimwi, wakwe, ivyakulya ni milembo.

Vino Mulinzile Ukumanya

• Ukulwala ulwale uwipisye nu kusakamikwa sana kungalenga mutapingula ningo pa vintu, na cii cingalenga mutaika amano uku vintu ivingamwazwa ukuya nu umi usuma. Nupya ulwale ungakomelako sile.

• Ndi cakuti musikuisakamala lino imulwala, cingalenga ulwale wakomelako nupya uumi winu ungaya umu uzanzo.

• Ndi cakuti muli nu umi usuma, cilamwangukila ukupingula ningo apa vintu lino mwaya ni intazi iipisye.

• Nanti cakuti mwemwe yapiina nanti akankala, kwaya vino mungacita pakuti mucingilile uumi winu.

Vino Mungacita

Umuntu wa mano akalolela limwi intazi zingamucitikila nu kucitapo vimwi ivingamwazwa ukuicingilila uku ntazi zizyo. Vikwene avino caya nu ku umi. Mungacefyako indwala ndi cakuti mukuisakamala nu kusunga ningo pano mukaikala. Kuicingilila kwazipa sana ukucila mwasumba impiya lino mwalwala.

Andileyasia walanzile ukuti: “Ndi cakuti tukuisakamala nu kusunga ningo pano tukaikala, cilalenga tutasumba sana impiya ukuya kuli ya dokota, ukuya ku cipatala nu kulonda imilembo.”