Leza Watandika Ukupanga Ivintu

IVINTU ivisuma vyonsi vino twakwata vyafuma kuli Leza. Wapanzile ilanzi pakuti kwaya uluswepo umusanya, nakupya wapanzile intanda nu mwezi pakuti kwaya uluswepo usiku. Nupya Leza wapanzile insi ukuti twaikala mwenemo.

Nomba Leza atatandikiilepo ukupaanga ilanzi, umwezi, intanda ni insi. Uzye watuumanya cino Leza watandikiilepo ukupanga? Nkoleelo, Leza wapanzile antu aakolana na aliwe. Antu yaayo tutanga tuyalole, wakwe vino tutanga tulole Leza. Muli Baibo antu yaayo yaka-amwa ukuti angeli. Leza wapanzile angeli ukuti aikala nayo ukwiyulu.

Umungeli wino Leza watandikiilepo ukupanga wali umuiyele sana. Wali iyeli lyakwe Leza, nupya umwana wiyo waombanga na Isi. Waombelanga pamwi na Leza pa kupanga ivintu vyonsi. Ali wino Leza waomvizye pa kupanga ilanzi, umwezi, intanda ni insi.

Uzye insi yalolekanga uli pa nsita iiya? Apa kutandika, kutaali umuntu nanti umwi umu nsi. Pataali nanti cimwi, paali sile ciyemba umu nsi yonsi. Nomba, Leza walondanga ukuti antu yace yaikala umu nsi. Lyene watandike ukutupekanyizizya ivintu. Uzye i vyani vino wacisile?

Icalondekanga inkoleelo, u luswepo. Lyene Leza wapanzile uluswepo ukufuma ukwi lanzi ukuti lwawala umu nsi. Wapanzile uluswepo pakuti kuye umusanya nu usiku. Ukufuma papo, Leza walenzile ukuti umusili utumpuke ukucila manzi ya muli ciyemba.

Pa mpanga pataali nanti cimwi pa kutandika. Insi yalolekanga wakwe vino ukulola pa cikope cii. Kutaali amaluwa, ivimiti nandi inyama. Kutaali ni inswi kwene muli viyemba. Fwandi Leza wakweti umulimo na uze ukulu uwakuziifya insi pakuti inyama na antu yakikalemo.