Yakobo Ali Nu Lupwa Ulukulu

LOLA ulupwa uukulu ululi apa cikope cii. Yaa aamwana Yakobo 12 aonsi. Wakweti na ana akazyana. Uzye wamanya amaziina yamwi ayana kwene yaa? Leka tumanye amaziina yamwi pali yaa.

Leya wavile Lubeni, Simeoni, Levi, na Yuda. Lino Lakeli waweni ukuti atakwatanga ana, wali sana nu ulanda. Lyene Lakeli watoozile Bilaa umuomvi wakwe nu kumupeela kuli Yakobo ukuti aye umuci wakwe, na Bilaa wavile ana aonsi yaili, yano Lakeli watemiile maziina ati Dani na Nafutali. Lyene Leya nawe watoozile umuomvi wakwe umukazyana Zilipa nu kumupeela kuli Yakobo ukuti aye mamakwe, na Zilipa wavile Gadi na Asyeli. Alino Leya nawe wizile akwata ana aonsi yaili, Isakali na Zebuluni.

Lino yonsi yaa yavilwe, Lakeli nawe wizile avyala umwana. Wamutemiile iziina ati Yosefu. Uku nkoleelo tulasambilila ivingi pali Yosefu pano wizile aya umuntu umucindame sana. Yaa, ali yana yano Yakobo wavile ala acili akwikala na Labani, isi wakwe Lakeli.

Yakobo wakweti na ana akazyana, nomba Baibo yalumbula sile iziina lya mukazyana wenga. Iziina lyakwe wali a Dina.

Insita yafisile lino Yakobo wapingwilepo ukusya Labani nu kuswilila uku Kenani. Lyene wakolonganiike ulupwa lwakwe ulukulu ni mfwele izingi alino ni ng’ombe, atandika nu lwendo lwapatali.

Lino Yakobo nu lupwa lwakwe yaswilile uku Kenani nu kwikalako insita inoono, Lakeli wavile umwana na muze umonsi. Umwana kwene wii waviilwe ala yali pa lwendo. Camutaliile sana Lakeli pa kuvyala, asuka afwa nu kufwa. Nomba akanya akonsi kene kaali sile ningo. Yakobo wakatemiile iziina ilyakuti Benjamini.

Cacindama sana ukuti twaiusya amaziina yakwe yamwana Yakobo 12 aonsi pano uluko lonsi ulwa Izlaeli akuno lwafumile. Alino imitundu 12 iya ina Izlaeli yafumiizye amaziina uku yana yakwe Yakobo 10 na yamwana Yosefu yaili. Isaki watwaliliile ukuya nu umi imyaka iingi ala alumendo yonsi yaa yavyalwa, nupya afwile wali sana ni nsansa ukukwata aizikulu aingi cuze. Nomba, Leka tulole icacitikiile umwizikulu wakwe umukazyana uwiziina lyakuti Dina..