Yakobo Nu Lupwa Yakukila Uku Eguputo

YOSEFU wafizilwe ukusipikizya. Waneenyile aomvi yakwe yonsi ukufuma umu muputule uno yaalimo. Lino wasyazile sile na ina yakwe, Yosefu watandiike ukulila. Aina yafwile yaazungwike sana pano yataamanyile cino walilanga. Wasusile ayaneena ati: ‘Nene Yosefu. Uzye tata apano acili?’

Aina yakwe Yosefu cayapezizye amano icakuti yataakweti ni vyakulanda. Yuvwile sana intete. Lelo, Yosefu wayaneenyile ati: ‘Izini apiipi.’ Lino yaapalamiile, wayaneenyile ati: ‘Nene Yosefu, umunyonko wino mwakazizye uku Eguputo.’

Yosefu watwaliliile ukulanda uku ina yakwe cikuuku-cikuuku ati: ‘Mutasakamala pali vino mwankazizye kuno. A Leza uwantumile ukwiza uku Eguputo pakuti mpususye antu. Falao wansoolola ukuya kateeka wa mpanga yonsi iya Eguputo. Fwandi swililiini zuwa-zuwa mukaneene tata vyonsi vii. Nupya mukamuneene ace ize aikala kuno.’

Lyene Yosefu watandiike ukukumbatila aina yakwe, nu kuyatonsola yonsi kwene. Lino Falao uvwile ukuti aina yakwe Yosefu yati-iza, waneenyile Yosefu ati: ‘Yapeele amaceleta yaswilile ukuti yakasende isi ni ndupwa zyao alino yace yawele kuno. Ndayapeela incende isuma sana umu Eguputo.’

Vivikwene vino Falao walaanzile avino yaacisile. Lola Yosefu pa cikope akuzengela isi nu lupwa lwakwe lino iizile uku Eguputo.

Ulupwa lwakwe Yakobo lwali ulukulu sana. Yonsi pamwi yaali 70 lino yakuukiile uku Eguputo, ngu kupendela kumwi na Yakobo, pamwi na ana yakwe alino na izikulu. Nomba paali na yamama, alino pafwile paali na aomvi aingi. Yonsi kwene iizile iikala umu Eguputo. Yaayamanga yakuti aina Izlaeli, pano Leza wasenwile iziina lyakwe Yakobo ati yaamwama ukuti Izlaeli. Aina Izlaeli iizile iyatemwikwa sana kuli Leza, wakwe vino tuli nu kusambilila.