Yona Ni Ciswi Cikulu

LOLA umonsi wiyo aali umu manzi. Ali ni ntazi, asi avivyo? Iciswi cico cimamumila! Uzye watumumanya umonsi wii? Iziina lyakwe a Yona. Leka tuvwe icalenzile ukuti Yona acule vii.

Yona wali a kasesema wakwe Yeova. Lino kasesema Elisya wafwile, pataalengiile nu kulengela Yeova aiza-neena Yona ati: ‘Yanga uku musumba ukulu uwa Ninive. Antu akuuku yakucita iviipe wakwe cimwi, lyene nkulonda ukayaneene ukuti yate ukwifya.’

Nomba, Yona ataalondanga ukuyako. Acino, wakwezile uwato uwayanga uku ncende yuze, ukutali na Ninive. Yeova wasosile sana pali vino Yona uutwike. Acino Yeova wakatwisye icimuza icikulu. Icimuza caali icikulu icakuti nu wato wakasi uku-unda. Ya kapisya ya wato yuvwile sana intete, lyene yaatandike ukulilila kuli tu leza twao.

Awe, a vino Yona wizile ayaneena ati: ‘Nemo nkapepa Yeova, Leza uwapanzile iyulu ni insi. Nomba nati-nkaana ukuomba umulimo uno Yeova wampeezile.’ Lyene ya kapisya ya wato yaamuzizye yati: ‘Lyene tukucite cani pakuti icimuza cii cite?’

Nawe wayaneenyile ati: ‘Nsumbilini muli yemba, nga alino icimuza cii cimaata.’ Ya kapisya ya wato yataalondanga ukumusumbila muli yemba, nomba lino icimuza cacizilemo, yasusile yamusumbila. Papo kwene sile ni cimuza icita, ni vimaimbi visila.

Lino Yona akuya pansi ya manzi, iciswi cikulu cimumila. Nomba ataafwile. Wali umu ciswi amanda yatatu umusanya nu usiku. Yona wali sana nu ulanda pa kukaanaya uku Ninive kuno Yeova wamutumile. Uzye watuumanya cino wacisile?

Yona wapefile kuli Yeova. Nawe Yeova walenzile iciswi ukuyalukila Yona ukunzi. Kufuma papo Yona waile nu ku Ninive. Fwandi icintu cii cikutusambilizya ukuti tulinzile ukucita vyonsi vino Yeova watuneena, asi avivyo?