Leza Walaya Ukuti Kulaya Paladaise

ICIKOPE cii cikulangizya paladaise wino Leza walangiizye kasesema Ezaya. Ezaya waliko pa mpanga ya pansi ala patali palengele ukufuma pano Yona wafwilile.

Paladaise, cikupiliula ukuti “icalo icisuma cuze.” Uzye icikope cii cakwiusya icintu cimwi cino twasambililepo umwibuku kwene lii? Uzye citakoliine ni calo icisuma cino Yeova Leza wapangiile Adamu na Eva? Nomba uzye insi yonsi ilatala iye paladaise?

Yeova waneenyile kasesema Ezaya ukulemba amazwi yamwi pali paladaise wino antu yakwe Leza yalaaikalamo. Walanzile ati: ‘Mimbulu ni mfwele vilaacinila pamwi mu mutende. Utwana twa ng’ombe na twakwe ya cisama tulaaliila pamwi, nu mwana munono alaavicema. Nanti sile akanya kwene kalaacinila apiipi ni inzoka ya usungu nomba italakaluma.’

Antu aingi yakati: ‘Ivintu vii vitanga vicitike. Myaka yonsi kwaya intazi pano nsi, nupya zilatwalilila vikwene.’ Nomba vwile, icalo cino Leza wapaangiile Adamu na Eva cali umu musango ci?

Leza wisile Adamu na Eva umu paladaise. Akuno sile yatuuvwilile Leza, acino wayazingiile ukufuma umu calo cicii icisuma, iyatandika nu kukota nu kufwa. Leza walaya ukuti alapeela antu amutemwa, vyonsi vino Adamu na Eva yaalekeeliizye.

Umu paladaise ipya mutalaya ivintu iviipe ivilaatucuzya. Mulaya umutende wa cumi. Antu yonsi yalaya nu umi usuma, kapya yalaya ni nsansa. Ivintu vilaya wakwe vino Leza walondanga ukuti viye apa kutandika. Nomba uku nkoleelo a kuno tulasambilila vino Leza alacita pakuti akaziifye ivintu.