Umonsi Aataakweti Intete

LOLA vino antu yakuseka umulumendo wi paa. Uzye watumumanya umulumendo wii? Iziina lyakwe a Yelemiya. Wali a kasesema wakwe Leza umucindame sana.

Lino paapisile sile insita inoono kufuma pano Yosiya watandikiile ukonoona utuluwi utwali umu mpanga iiya, Yeova waneenyile Yelemiya ukuya kasesema wakwe. Nomba, Yelemiya wene waweni kwati atanga aye kasesema, pano wali umwance sana. Nomba Yeova wamuneenyile ukuti wali nu kumwavwa.

Yelemiya watandike ukuneena aina Izlaeli ukuta ukucita ivintu iviipe. Watangi: ‘Tu leza tuno antu yakaapepa, u twaufi.’ Nomba aina Izlaeli aingi yaatemilwe ukupepa utuluwi; yataalondanga ukupepa Leza wa cumi, Yeova. Lino Yelemiya waneenanga antu ukuti Leza alayafulula pa viipe vino yaacitanga, yene yaamusekanga sile.

Awe, ni myaka iingi yapisile. Yosiya wafwile, nupya lino paapisile imyezi itatu ukufuma pano wafwilile, umwanakwe, Yeoyakimu wamupyanyile. Yelemiya watwalilile ukuneena antu ukuti: ‘Umusumba wa Yelusalemu ulonoonwa nga mutatiile ivicitwa vinu iviipe.’ Lyene yasimapepo yalemile Yelemiya nu kumupundilila yakuti: ‘Ulinzile ukufwa pa kulanda amazwi yaa.’ Alino yaaneenyile aikolo amu Izlaeli yati: ‘Yelemiya alinzile ukufwa, pano akuti umusumba witu ulonoonwa.’

Uzye lyene Yelemiya wacisile uli? Wene ataatiinyile! Watwaliliile sile ukuyaneena ati: ‘A Yeova uwantumile ukwiza-muneena amazwi yaa. Nga musikuta imiyele inu iipe, Yeova alonoona Yelusalemu. Nomba, cino mulinzile ukumanya aeci: Nga mwangumoola, alemumoola sile umuntu wa kaele.’

Aikolo ya mu Izlaeli yataakomile Yelemiya, nomba aina Izlaeli yaatwalilile ukucita iviipe. Awe, wanda umwi Nebukadineza umwene wa Babiloni wizile uku kulwisya Yelusalemu. Umwene wiyo wacimvizye aina Izlaeli nu kuyacita azya. Antu aingi wayasenzile uku Babiloni. Vwile wemo unguvwa uli nga antu yamwi yano utaamanya iza-yakusenda nu kukutwala uku mpanga yuze?