Kufuma Lino Yaasenzilwe Umu Uzya Ukufika Lino Iviumba Vya Yelusalemu Vyakuuzilwe Nupya

Lino aina Izlaeli yaali umu uzya uku Babiloni, yaali sana na mezyo. Syadilaki, Mesyaki, na Abedinego yaayasumbiile umwilungu lya moto ala iilikaya cuze, nomba, Leza wayacingiliile nupya yaafumilemo ala apuma. Lyene, lino aina Babiloni yaayacimvizye uku ina Mede na ina Pesya, Danieli izile iyamusumbila umu ciwina cakwe ya cisama, nomba nawekwene Leza wamucingiliile lino wayazile utunwa twakwe ya cisama.

Lyene umwene wa ku Pesya, Sailasi, wakulwile aina Izlaeli. Lino paapisile sile imyaka 70, aina Izlaeli yaaswiliile uku mpanga yao, kufuma uku Babiloni kuno yaayasenzile umu uzya. Icintu conga pali vino yaatandikiilepo ukucita lino yaaswiliile uku Yelusalemu, u kukuula ing’anda ya kupepelamo Yeova. Nomba, alwani yao yaayalesizye ukuomba umulimo uuwa. Ali cino, pakuti sile yamaliile ukukuula ing’anda ya kupepelamo, casenzile imyaka umupiipi na 22 ukufuma pano yaaweliile umu Yelusalemu.

Nacunze, tulasambilila pali Ezila lino wawezile uku Yelusalemu umu kuzifilizya ing’anda ya kupepelamo Yeova. Wawezile ala paapita ni myaka 47 ukufuma pano yaamaliliile ukukuula ing’anda ya kupepelelamo. Nupya, imyaka 13 kufuma pano Ezila waweliile, Neemiya nawe wizile aazwilizya ukukuula ningo-ningo iviumba vya Yelusalemu ivyawiile. Ciputulwa Cakwe CISANO (5) cikaalanda pa vintu ivyacitiike pa myaka 152.