Aonsi Yano Ulutanda Lwatungulwile

UZYE watuulola ulutanda lulo ulukwaka sana luno umonsi wii akusonta? Ulutanda luu lwaloliike lino yaafumanga uku Yelusalemu. Aonsi ya paa yakufuma uku Ufumondaka, nupya yakasambilila apa ntanda. Fwandi iyamanya ukuti ulutanda luu ulukwaka sana lukuyatungulula uku muntu umwi umucindame sana.

Lino antu yaa yaafisile uku Yelusalemu, yuzizye yati: ‘Uzye aekwi ukuli umwana wino alaya umwene wa aYuda?’ Izwi lyakuti “aYuda” i cili-cimwi nu kuti aina Izlaeli. Lyene aonsi yaa yaavwanzile yati: ‘Twaweni ulutanda ulwalanganga ukuti kuli umwana, ala tucili uku Ufumondaka, ali cino twiziile ukuti tumupepe.’

Lino Helodi uwali umwene wa Yelusalemu uvwile vii, wasosile cuze. Ataalondanga ukuti umwene muze ace amupyane. Acino, Helodi wamile yasimapepo yakalamba nu kuyuzya ati: ‘Uzye umwene uwalavilwe alavyalilwa kwi?’ Nayo yaamwaswike yati: ‘Baibo ikati u ku Betelemu.’

Nga alino Helodi wamile aonsi aafumile uku Ufumondaka nu kuyaneena ati: ‘Yangini mukalonde sana ukuli umwana wiyo. Ndi mwaca mwamuzana, muce mwize muuneene. Nkulonda ukuti nanikwene nkaye kweneko ku kumupepa.’ Nomba cino Helodi walondanga, u kuyakoma umwana wiya!

Lyene ulutanda lwatungulwile aonsi uku Betelemu, iluya-lwimilila papakwene pano umwana wayeliile. Lino aonsi yaaya ingile umu ng’anda, yaazanyile Maliya nu mwana Yesu. Yaaleesile mawila aingi nu kupeela Yesu. Nomba, ukufuma papo, Yeova waneenyile aonsi yaaya umu ciloto ukuti yatafwile ukuswilila kuli Helodi. Acino, pa kuswilila uku mwao, yaapisile inzila yuze.

Lino Helodi uvwile ukuti aonsi aku Ufumondaka yaaswilila mpiti, wasosile ukucilapo. Lyene watumile aomvi yakwe ukuti yakumoole ana yoonsi aonsi aali ni myaka ya kuvyalwa iili nu kwiza pansi. Nomba lino yatatala yatandika ukukoma ana, Yeova waneenyile Yosefu umu ciloto ukuutusya umwana, nawe Yosefu waile nu lupwa lwakwe uku Eguputo. Lino paapisile insita, Yosefu uvwile ukuti Helodi wafwa, acino, wasenzile Maliya na Yesu nu kuswilila uku Nazaleti. Ali kuno Yesu wakuliile.

Uzye vwile ungati a weni uwalenzile ukuti ulutanda lulu lwake? Iusya ukuti lino aonsi yaaweeni ulutanda, yaatandikiile ukuya uku Yelusalemu. Satana Ciwa walondanga ukumoola Umwana wakwe Leza, nupya wamanyile ukuti Umwene Helodi uwa ku Yelusalemu alatemwa ukukoma umwana wiyo. Fwandi tungati Satana aliwe walenzile ukuti ulutanda lulu lwake.