Yesu Nu Mwanaci Pa Cifula

YESU wimilila pa cifula umu Samaliya kuti apuzeko. Asambi yakwe yayile umu muzi uku kukala ivyakulya. Wino Yesu akulanda nawe, u mwanaci uwataiza umu kusemba amanzi. Yesu wamuneenyile ati: ‘Nkulenga amanzi.’

Umwanaci wazungwike sana. Uzye watuumanya umulandu uno wazungukiile? Pano Yesu wali umuYuda nu mwanaci nawe umwina Samaliya. Ayuda aingi yataatemilwe aina Samaliya. Yataalondanga nanti sile ukuvwanga nayo! Nomba, Yesu wene watemilwe antu amitundu yonsi. Acino, waneenyile umwanaci wii ati: ‘Umanya uwali wakulenga amanzi, naawe ngi wamulenga ukuti akupeele amanzi akapeela uumi.’

Nawe umwanaci alanda ati: ‘Yasikulu, cifula cii cazika cuze, nupya mutakweti icakusembela amanzi. Aukwi kuno mumafumya amanzi yaayo aakapeela uumi?’

Lyene Yesu wamulondolweliile ati: ‘Ndi cakuti wamwa amanzi ukufuma umu cifula cii, uluvwa ulusala nupya. Nomba amanzi yano nkapeela yangalenga umuntu ukwikala amande pe.’

Umwanaci nawe alanda ati: ‘Yasikulu mpeliini amanzi kwene yaayo! Lyene ntalumvwa ulusala nupya. Nupya ntalawela uku cifula uku kutapa amanzi.’

Umwanaci wii welenganyanga ukuti Yesu walandanga apa manzi kwene yano tukaamwa. Lelo, cino Yesu walandangapo i cumi pali Leza nu wene wakwe. Icumi caya wa manzi aakapeela uumi. Cingapeela umuntu umi wa pe.

Lyene Yesu waneenyile umwanaci ati: ‘Yanga kaame uwako uwize nawe.’

Nawe umwanaci waswike ati: ‘Nemo ntakwata uwane.’

Yesu nawe ati: ‘Cino walanda i cisinka sana. Nomba wakwetipo aonsi 5, na wino ukwikala nawe asi uwako foo.’

Mwanaci wazungwike sana, pano vyonsi vino Yesu walanzile, vyali vya cumi. Uzye Yesu wamanyile atuuli vyonsi vii? Yesu, watumilwe ukufuma kuli Leza, fwandi Leza kwene u wamuneenyile vyonsi vii. Lyene lino asambi yakwe Yesu yaawezile, yazungwike sana ukuzana Yesu akulanda nu mwanaci umwina Samaliya.

Uzye i vyani vino twasambilila kuli vyonsi vii? Twati-tusambilila ukuti Yesu watemwa antu amitundu yonsi. Acino nafwe tulinzile ukutemwa antu amitundu yonsi. Tutalinzile ukwelenganya ukuti antu yamwi yaipa pa mulandu wakuti twapusana inkanda. Yesu wene cino akalonda ukuti antu yonsi yamanye, i cumi icilayapeela umi wa pe. Fwandi nafwe kwene tulinzile ukusambilizya antu pakuti yamanye icumi.