Yayafumya Umu Cifungo

LOLA umungeli watayula icisaasa ca ku cifungo. Aonsi yano akufumya aatumwa yakwe Yesu. Leka tuvwe icalenzile ukuti yayayalile umu cifungo.

Paapisile sile insita inoono kufuma pano umupasi wa muzilo wapongolwilwe apa yasambi yakwe Yesu. Icacitiike aeci: Wanda umwi akasanya, Petulo na Yoane iingilanga umu ng’anda ya kupepelamo uku Yelusalemu. Lwa pa mulyango, paali umonsi umwi uwavilwe umulemale. Cila-wanda, antu yaamukatusyanga nu kumutwala papakwene pakuti aalenga impiya uku yantu aingilanga umu ng’anda ya kupepelamo. Lino waweni Petulo na Yoane, walenzile kuti yamupeeleko vimwi. Uzye umanyile vino atumwa yaacisile?

Imiliile iyalolekesya umonsi wiiya umupiina. Lyene Petulo wamuneenyile ati: ‘Kwene nemo impiya ntakweti, nomba namakupeela vino nkweti. Umwiziina lyakwe Yesu, nkuti katuka utandike ukupita!’ Alino, Petulo walemile umonsi wiya apikasa, nu monsi wiyo watolwike ilimba atandika nu kupita. Lino antu yaaweni vii, yaazungwike cuze nu kuzanga sana pa cizungusyo cii.

Lyene Petulo wayaneenyile ati: ‘Aamaka yakwe Leza uwatuutulwile Yesu aliyo yalenga tucite icizungusyo cii.’ Lino wene na Yoane yacili yakuvwanga vii, kwizile yasimapepo. Yaasosile pa kuvwa ukuti Petulo na Yoane yaaneenanga antu ukuti Yesu watuutulwike. Acino, yaayalemile nu kuyayalila umu cifungo.

Uwanda wakonsilepo, yasimapepo yaakongiine pamwi. Yaaleesile Petulo na Yoane alino nu monsi uwali umulemale wino yaapozizye. Nga alino yasimapepo yaaya yuziizye yati: ‘Uzye aamaka ci yano mwaomvizye ukucita icizungusyo cii?’

Petulo wayaneenyile ukuti aamaka yakwe Leza uwatuutulwile Yesu. Lyene yasimapepo yataamanyile ivyakucita pano yaafizilwe ukukana ukuti icizungusyo cikalamba cene cacitiike. Acino yaaneenyile sile atumwa ukuta ukuvwanga pali Yesu, nu kuyata yapita.

Cila-wanda, atumwa yatwaliliile ukukosoola pali Yesu nu kupozya alwale. Malyasi pa vizungusyo vii yaasalangine mpanga yonsi. Lyene antu aingi amu mizi iyayeliile apiipi na Yelusalemu, nayo kwene yaatandiike ukuleeta alwale kuti atumwa yayapozye. Yasimapepo yuvwile uzuwa icakuti yaalemile atumwa nu kuyayalila umu cifungo. Nomba atumwa yataalengiile umu cifungo.

Usiku kwizile umungeli wakwe Leza uwizile ayula icisaasa wakwe vino ukulola pa cikope. Umungeli wiyo walanzile ati: ‘Yangini mukiimilile umu ng’anda ya kupepelamo nu kutwalilila ukusimikila antu.’ Uwanda walondeliilepo, akatondo, yasimapepo yaatumile aonsi akuyasenda atumwa uku cifungo, nomba yaazanyile yasimo. Lyene yaayazanyile ala yakusambilizya umu ng’anda ya kupepelamo, nga alino yaayasenzile nu kuyatwala uku cilye cikalamba.

Lyene kuuku yasimapepo yaile yalanda yati: ‘Twamuneenyile ukuta ukusambilizya pali Yesu, nomba lolini, imuzuuzya Yelusalemu yonsi ni visambilizyo vinu.’ Alino atumwa yaaswike yati: ‘Tufwile ukutontela Leza ukucila ukutontela antu.’ Avino yaatwaliliile ukusambilizya “ilandwe lisuma.” I cumicumi tufwile ukukolanya atumwa, uzye asi avivyo?