Yaunda Apiipi Ni Cilila

LOLA! Uwato wati-uunda! Ukulepooka nu kulepooka! Uzye watuulola antu ati-yatolokela umu manzi? Yamwi yene yati-yafika nu ku cituntu. Uzye Paulo watumulola paa? Leka tuvwe icati-cicitikila Paulo.

Iusya ukuti, apa myaka iili Paulo wali umu cifungo uku Kesaliya. Lyene yizile yamufumya nu kumulonga umu wato pamwi na afungwa yauze, nupya yaayasenzile uku Loma. Lino yaapalamiile sile uku cilila ca Kulete, icimuza icikalamba cakatwike. Icimuza cakomile cakuti iyafilwa nu kufiya uwato. Nupya yataalolanga ni lanzi umusanya nanti sile ukulola intanda usiku. Lyene lino paapisile amanda aingi, yonsi ali umu wato yaatiile nu kutaila ukuti yamapusuka.

Avino Paulo wimiliile nu kuvwanga ati: ‘Kusi nanti a wenga aamafwa, suka sile uwato ulio umalepooka. Usiku umungeli wali-wiza kuli nene nu kulanda ati, “Paulo, utatiina! Ulinzile ukuya-lolekela kuli Kesa kateeka wa ina Loma. Nupya mwensi kwene Leza amamupususya.”’

Lino sile icaya usiku apakasi, apa wanda walenga ikumi na yani (14) kufuma pano icimuza catandikiile, yakafiya ya waato yaweeni ukuti amanzi yatandika ukuceepa! Lyene pa mulandu ni intente zino yuvwanga yati manye yangapuma umu milunda, yatoozile inanga iisya pakuti zimike uwato. Akatondo uwanda walondeliilepo yaaweeni icituntu. Avino yizile yezya ukuti akuno yangaya yakasiike nu wato.

Lino yaapalime uku cituntu cakwe yemba, uwato wizile iupunka umu cimutumba ca mucanga uwatuliime muli yemba, iutika nu kutika. Alino amayimbi yatandika ukuuma umu wato, cakuti uwato utandika nu kulepooka. Mukalamba uwa yasilika walanzile ati: ‘Mwensi mwemuno mwamanya ukowa, tolokiini mutandike ukowa ukuya uku cituntu. Lyene mwe yano mutaamanya ukoowa, musyalikile, ngalino muleme utupimfya twa mbao utuputosile uku wato alino mwaowa ukuya uku cituntu.’ Vikwene avino yonsi yaacisile. Antu yonsi 276 aali umu wato yaafumile uku mulundu ala apuma, kulingana navino umungeli wayalavile.

Cilila ciici yaacamanga ukuti Melita. Antu aazanyilwepo yaali ni cikuuku sana, nupya yaasunzile ningo antu kwene yaa aafumile umu wato. Lyene lino umuza wacefileko, Paulo yaamulonzile nupya umu wato uze nu kumusenda uku Loma.