Angeli Yamwi Yapondwike
Lino Satana walanzile na Eva ukuomvya inzoka, Eva uvwilile, nawe apondokela Leza, wakwe Satana kwene
Angeli yonsi sile yano Yeova wapanzile yaali asuma. Lyene kwali umungeli umwi uwapondwike. Umungeli wiyo a Satana Ciwa. Satana walondanga ukuti antu yamupepa aliwe ukuluta ukupepa Yeova. Ivyacitike aivi:
Umu calo ca Edeni, mwali imiti ingi iyaseekanga ivizao ivilyompe. Yeova wanenyile Adamu na mamakwe, Eva, ukuti yaali nu kulalya ivizao vya miti kwene ii. Nomba, kwali umuti onga uno Leza wayalesizye ukulyako. Wayanenyile ukuti ndi yalya, yaali nu kufwa.—Ukutendeka 2:9, 16, 17.
Wanda umwi lino Eva wali wenga, inzoka yamuvwanzizye. Nomba, asi inzoka iyavwanzile; wali a Satana Ciwa uwalenzile ciloleke kwati inzoka iyalandanga. Satana wanenyile Eva ukuti ndi waalya icizao cino Leza wayalesizye, wali nu kukolana na Leza. Walanzile nu kuti Eva ataali nu kufwa. Vyonsi vino Satana walanzile waali ufi uwafiita fititi. Nomba, Eva wene uvwilile Satana nu kulya icizao cici. Wapeezileko na Adamu, nawe waliile.—Ukutendeka 3:1-6.
Ku vintu kwene vii ivyacitike, tukasambilila ukuti Satana a cipondoka nupya uwa ufi. Wanenyile Eva ukuti nanti atuuvwilile Leza, ataali nu kufwa. Uu waali ufi. Eva na Adamu yaafwile. Satana ataafwile papo kwene, lelo alafwa uwanda umwi, pano waifizye. Nomba, apa nsita ii, Satana akuno waya nupya watwalilila ukuponzya antu. Acili akasomba, nupya akaezya na maka ukutunka antu ukutama masunde yakwe Leza.—Yoane 8:44.
Kwali Angeli na Yauze Apondwike
Mukuya kwa nsita, angeli yauze izile yapondoka. Angeli yayo yaweni anaci alolekanga ningo sana umu nsi, nupya yatandike ukulondesya ukulala na anaci yayo. Lyene izile pano nsi nu kusanguka antunze aonsi. Nga alino iyaitoolela anaci. Cii capusine sana nu kulonda kwakwe Leza.—Ukutendeka 6:1, 2; Yuda 6.
Angeli aipe izile umu nsi umu kucita ulalelale na anaci
Calenzile ukuti antunze yaye sana ni ntazi. Yamama ya angeli kwene yaa yavile ana, nomba ana yayo yapusine na ana yauze. Lino yakuzile izile iyaya ivipombolo vipe imyenzo nupya ivyalwete cuze. Mukuya kwa nsita, umu nsi mwizile imuya sana unkalwe, i calenzile ukuti Yeova aonone antu aipe muli mulamba mukalamba. Antunze aapuswike lino kwali Mulamba a Nowa nu lupwa lwakwe casila.—Ukutendeka 6:4, 11; 7:23.
Nomba, angeli aipe, yasangwike imipasi nupya; yataafwile. Lelo, Leza wayafulwile. Atayazumilizye ukuswilila ukwiyulu ku angeli yakwe Leza aololoke. Nakupya, Yeova wayaposile amaka yakusanguka antunze. Lyene icilayacitikila i cakuti yalonoonwa umu upinguzi ukalamba.—2 Petulo 2:4; Yuda 6.
Satana Wasumvilwe Ukufuma Umwiyulu
Satana na angeli yakwe aipe yasumvilwe ukufuma ukwiyulu
Umu 1914, kwali inkondo umwiyulu. Ibuku lya muli Baibolo ilya Umbwilo likalondolola ivyacitike, likati: “Nupya mwiyulu mukatuka ulwi. Mikaeli [kuli kuti Yesu Klistu uwatutulwike] na angeli yakwe [asuma] yalwisyanya ni cizoka [kuli kuti Satana] nga cizoka pamwi na angeli yakweco [aipe] yalwisyanya nao. Lelo cizoka na angeli yakweco yacimviwa cakuti yatakweti pa kwikala mwiyulu. Cizoka cikulu cisumbwa pansi cene cili cizoka ca mpiti cino yakati Ciwa nanti Satana, wino akasomba antu amu nsi. Wene pamwi na angeli yakwe onsi yasumbwa pano nsi.”
Uzye lyene icafumile umu nkondo kwene ii icani? Ilyasi lyatwalilila ukuti: “Acino zangini mwe mayulu na mwe muno mwikalamo!” Angeli asuma yaali nu kuzanga pano Satana na angeli yakwe aipe, ala yasiko ukwiyulu. Nomba, nga antu apa mpanga ya pa nsi, yene cali uli? Baibolo ikati: “Kalanda ku amu nsi na yemba! Pano Ciwa watasumbwa pa nsi kuno muli, nupya ali nu ukali cuze pano amanyile ukuti watasyala sile ni nsita inono.”—Umbwilo 12:7-9, 12.
I cumicumi, Satana na angeli yakwe aipe yakaponzya nu kucuzya sana antu pano nsi. Angeli kwene yaa aipe yaka-amwa ukuti iviwa. Aalwani yakwe Leza. Yonsi kwene aipe cuze.