Kuwatiziwa Kulalenga Mukaye Cuza Wakwe Leza

1. I cani icalenzile ukuti umwina Etiopiya apingulepo ukuwatiziwa?

UMU nsita ya atumwa, kwaliko umwina Etiopiya umwi uwali umuomvi wa pisano; umonsi wiyo uuzizye iuzyo ati, “Amanzi aeya paa. I cani icingandesya ukuti mbatiziwe?” Umwina Klistu umwi uwizina lyakuti Filipi walanzile uku monsi wiyo ukuti Yesu wali ali Mesiya wino walavilwe ukuti aliza. Vino umwina Etiopiya wasambilile mu malembelo, vya mufisile pa mwenzo sana, icakuti vyalenzile apingulepo ivyakucita. Wapingwilepo ukuwatiziwa!—Milimo 8:26-36.

2. U mulandu ci uno mulinzile ukwelenganyizizyapo sana pa kuwatiziwa?

² Ndi cakuti mumvwikisya vino mwasambilila mu vipande vyonsi ivya mwibuku lii na Nte wakwe Yeova, limwi namwe kwene munguzya iuzyo lyakuti, ‘Uzye i cani icikundesya ukuwatiziwa?’ Lyene mwasambilila ulayo wa muli Baibo uwa kuti kulaya umi wape umu Paladaise. (Luka 23:43; Umbwilo. 21:3, 4) Nupya mwasambilila ivya cumi pali vino afwe yaaya alino nu utailo wakuti yonsi afwa yalatuutuluka. (Kasambilizya 9:5; Yoane 5:28, 29) Ndi mukalongana pamwi na ya Nte yakwe Yeova, ukwaula nu kutwisika mwailolela mweineco vino ukupepa kwa cumi kwaya. (Yoane 13:35) Icintu icazipisya i cakuti, ucuza winu na Yeova Leza watandika ukukomelako.

3. (a) I sunde ci lino Yesu wapeezile alondezi yakwe? (b) Uzye ukuwatiziwa kufwile ukuya uli?

³ Mungacita uli pa kulangizya ukuti mukalonda ukuombela Leza? Yesu wanenyile alondezi yakwe ati: “Caleka yangini konsi . . . mucite antu amu nko zyonsi kuya alondezi yane, Mwayawatizya.” (Mateo 28:19) Yesu walangiliile vino cifwile ukuya, lino wawatiziwe mu manzi. Pa kuwatiziwa yatamusansile sile amanzi, awe, nakupya yatamwitiile manzi apa mutwe foo. (Mateo 3:16) Izwi lya kuti “kuwatiziwa” lyafuma ukwizwi lya ciGliki ilikasenula ukuti “kutuwika.” Acino fwandi aina Klistu pa kuwatiziwa, yafwile ukutuwikwa mu manzi umwili onsi.

4. Uzye ukuwatiziwa umu manzi cikalangilila cani?

⁴ Icintu icacindama cino umuntu angacita nga akulonda kuya cuza wakwe Yeova Leza, u kuwatiziwa umu manzi. Kuwatiziwa kukalangizya apaswe ukuti mukulondesya ukuombela Leza. Nakupya, kukamanyisya ukuti mukulondesya kulacita ukulonda kwakwe Yeova. (Masamu 40:7, 8) Lelo, kwaya ivintu vimwi vino umuntu afwile wacita pakuti alinge ukuwatiziwa.

KUMANYA NU UTAILO VIKALONDEKWA

5. (a) I cani icakutandikilapo ukucita pakuti mulinge ukuwatiziwa? (b) U mulandu ci uno kulongana kwa ina Klistu kwacindamila?

⁵ Mwatandika mpiti ukucita icintu ca kutandikilapo pakuti mulinge ukuwatiziwa. U mu nzila ci? Mukasambilila pali Yeova Leza na Yesu Klistu, pakuti muyamanye. (Yoane 17:3) Nomba kuliko navyuze ivingi vino mulinzile ukusambilila. Aina Klistu yakalondekwa ‘kuya nu umanyililo wingi wa kucita kulonda kwakwe Leza.’ (Kolose 1:9) Kuzanwa lyonsi ku kulongana kwa ina Klistu i cintu cimwi cisuma icingamwavwa kucita vivyo. Cazipa sana ukuya ku kulongana kuuko. (Ayebulai 10:24, 25) Kuzanwa lyonsi ku kulongana, kulamwazwa ukumanya sana Leza.

6. Uzye mufwile ukumanya ivingi sana nga alino muwatiziwe? Londololini.

⁶ Ukuya kwene, asi vyonsi vino mufwile kumanya pakuti mulinge ukuwatiziwa. Umonsi umwina Etiopiya wino twati tulandapo wamanyileko vimwi, lelo walondekwanga ukuvwikisya ivisambililo vimwi ivya mu malembelo. (Milimo 8:30, 31) Namwe kwene, kucili ivingi vino mufwile ukusambilila. Fwandi, mutalata ukusambilila pali Leza. (Kasambilizya 3:11) Lelo, lino mutatala mwawatiziwa, mulinzile mwamanya nu kuzumila ivisambilizyo vya kutandikilapo ivya muli Baibo. (Ayebulai 5:12) Pa visambilizyo vivyo paaya na vii: Ukutaila vino Baibo ikasambilizya pa yafwe alino nu kumanya ucindami wi zina lyakwe Leza nga nu Wene wakwe.

7. Uzye ukusambilila Baibo kulamwazwa uli?

⁷ Nomba, asi kuti ndi mwamanya Leza ala casila, pano Baibo ikati, “kusi umwi angazanzya Leza kwaula kukwata utailo.” (Ayebulai 11:6) Baibo ikalondolola ukuti antu yamwi aali umu musumba wa Kolinto yuvwile ilandwe lya wene, icakuti “yataila, nga yawatiziwa.” (Milimo 18:8) Namwe kwene ukusambilila Baibo kulinzile ukumulenga ukutaila ukuti Baibo Izwi lyakwe Leza. Nupya kulinzile kwamwazwa ukutaila vino Leza walaya, na vino imfwa yakwe Yesu ilamwavwa pakuti mukapusuke.—Yoswa 23:14; Milimo 4:12; 2 Timoti 3:16, 17.

KUNENAKO ANTU YAUZE ICUMI CA MULI BAIBO

8. I cani icilalenga ukuti mutandike ukusambilizyako yauze pali vino mwasambilila?

⁸ Lino utailo wino ulaakomelako, mulalola ukuti cikumutalila ndi mutanenyileko antu yauze vino mwasambilila muli Baibo. (Yelemiya 20:9) Mulaya nu luzango sana kusimikilako antu yauze pali Leza na vino akaalonda ukucita.—2 Kolinto 4:13.

9, 10. (a) Uzye aaweni yano mulinzile kutandikilapo kunenako icumi ca muli Baibo? (b) Uzye mulinzile kucita uli pakuti mutandike ukusimikila pamwi na ya Nte yakwe Yeova?

⁹ Pa kunenako yauze vino mwasambilila muli Baibo, mungatandikilapo kusimikilako yalupwa inu, yacuza inu, yano mwapalamana nayo, alino na yano mukaomba nayo incito. Nga mwacita vivyo, mulazana ukuti mwatandika nu kulondesya ukuombela pamwi na ya Nte Yakwe Yeova umu mulimo wa kukosoola. Pakuti mumanye ivya kucita, mungalanzyanya na Nte kwene wino akamusambilizya Baibo pakuti amulondolwele. Ndi caloleka ukuti mungalinga ukuya uku kusimikila pamwi na ya Nte, kulaya mapekanyo akuti ya eluda yaili aapa cilongano yakalanzyanye namwe pamwi na wino akamusambilizya Baibo.

¹⁰ Kucita vivyo kulalenga ukuti mukamanye ningo ya eluda yamwi, aakacema iuvi lyakwe Leza. (Milimo 20:28; 1 Petulo 5:2, 3) Ya eluda yaa ndi yaaca yalola ukuti mwati mumanyako nu kuzumila ivisambilizyo vya muli Baibo, ivikauvwana na masinte ya masunde yakwe Leza, nupya mukulondesya ukuya Nte wakwe Yeova, lyene yalamumanyisya ukuti mwati mulinga ukuya kasimikila uwilandwe lisuma aatatala wawatiziwa.

11. Pakuti umuntu alinge ukutandika ukusimikila, i cani cino afwile ukucita inkoleelo?

¹¹ Ya eluda kwene aliyo yangalola ndi cakuti mukulondekwa kusenuka mu vicitwa vimwi alino ni miyele imwi ino mwakwata, pakuti mukalinge ukuya kasimikila. Cii cikupiliula ukuti mulinzile mwata tumisango utusizanzya Leza. Fwandi, lino mutatala mwalanda ukuti mukulonda kuya kasimikila aatawatiziwa, nkoleelo mufwile kutaluka ku miyele iipe, wa upulumusi, ucakolwa, nu kuta ukuomvya milembo iikavulunganya uwongo.—1 Kolinto 6:9, 10; Galatiya 5:19-21.

KULAPILA NU KUSENUKA

12. U mulandu ci uno cazipila ukuti umuntu alapile lino ataatala wawatiziwa?

¹² Kwaya navyuze vino mulinzile ukucita pakuti mulinge ukuwatiziwa. Mutumwa Petulo walanzile ati: “Lapilini, nu kusenukila kuli Leza pakuti maifyo inu yafuutwe.” (Milimo 3:19, NW) Ndi mwalapila, ala cikusenula ukuti mwata ukucita iviipe vyonsi vino mwacitanga. Fwandi cazipa sana ukulapila ndi umuntu waali ni miyele iipe; nanti sile umuntu wiyo ataacitanga iviipe, nawe kwene alinzile ukulapila. U mulandu ci uno twalandila vivyo? Umulandu u wakuti fwensi kwene fwefwe ya kaifya nupya tukalonda ukuti Leza aatwelela. (Loma 3:23; 5:12) Lino mutatala mwatandika ukusambilila Baibo, mutaamanyile vino Leza akalonda. Kuli kuti mutaamanyile vino mungacita pakuti mwazanzya Leza, uzye asi avivyo? Fwandi ukulapila kwacindama wakwe cimwi.

13. Uzye ukusenuka kuli kucita uli?

¹³ Muntu ndi walapila alinzile nu kusenuka mu vicitwa. Mulinzile mwasenuka nu kuta ukwelenganya pa vintu kwene vivyo. Ivintu vya mpiti vino mwacitanga mufwile mwavililako nu kutwalilila kulacita ivintu ivyaololoke manda yonsi. Lino mutaatala mwawatiziwa, inkoleelo mufwile mwalapila nu kusenuka.

KUIPEELA MWEINECO

14. I cintu ci icacindama sana ukucita lino mutaatala mwawatiziwa?

¹⁴ Kwaya nacuze icacindama sana cino mufwile ukucita lino mutaatala mwawatiziwa. Mulinzile mwaipeela mweineco kuli Yeova.

15, 16. Uzye ukuipeela kuli Leza kuli kucita uli, nupya i cani icikalenga umuntu acite vivyo?

¹⁵ Nga mwaipeela kuli Yeova Leza umwipepo kufuma pansi ya mwenzo winu, ala mwalaya Yeova ukuti wene wenga sile awino mulaaombela amanda yonsi. (Malango 6:15) Uzye u mulandu ci uno umuntu alinzile kuombela sile Leza? Pa kwasuka iuzyo lilyo, katulangilile: Tuti umonsi walola mama, nu kumutemwa. Lyene lino wamanya ukuti ali ni miyele isuma, akaatandika ukumutemwa sana, asuka amulanzya nu kumulanzya. Lyene wanda umwi, alasuka amutaisye. I cacumi ukuti kutwala nanti ukutwalwa u mulimo ukome. Nomba, kutemwa kuno umonsi wiyo wakwata kulamulenga ukuti atwale.

¹⁶ Ali vino caya nakuli Yeova, nga mwamumanya nu kumutemwa, ala mwakulamuombela ukwaula kusiima, nanti ukumupepa sile lino mukulonda. Wensi aakulonda ukuya umulondezi wakwe Yesu Klistu, umwana wakwe Leza, alinzile “aikanye.” (Mako 8:34) Ndi cakuti miyeele iitu na vino tukalonda ukucita umu umi witu vitatononiile ukutemwa kuno twatemwa Leza, ala twaikanya. Lino mutaatala mwawatiziwa, cazipa ukutala imukolezya kucita kulonda kwakwe Yeova.—1 Petulo 4:2.

VINO MUNGACITA NGA MUKATIINA UKUIPEELA

17. I cani icikalenga antu yamwi kukaana pingulapo ukuipeela kuli Leza?

¹⁷ Yamwi yakavilwa ukupingulapo ukuipeela kuli Yeova pano yakauvwa intete. Yakatiina ukuti ndi yaipeela yaaya aina Klistu, limwi yangaluvyanya cimwi cakuti Leza asoke. Kukwata intete zya musango uuwo, kukalenga yamwi yaelenganya ukuti cazipa nu kukaana ipeela kuli Yeova.

18. I cani icingamwavwa ukuti mupingulepo ukuipeela kuli Yeova?

¹⁸ Ndi mukusambilila ivingamwavwa ukutemwa Yeova, cilalenga muce mupingulepo ukuipeela kuli aliwe, nupya mulatwalilila ukucita vino mwalaya ukuti avino mulaacita lyonsi. (Kasambilizya 5:4) Lino mwapingulapo ukuipeela, i cumicumi mulalondesya “ukwikala ndi vino Mwene [“Yeova” NW] akaalonda nga lyonsi mulaacita ivintu vino vikazanzya Mwene.” (Kolose 1:10) Nga mwamutemwa Yeova, mulalola ukuti fwandi citaatala kucita ukulonda kwakwe. Lyene mulazumila ivyalemvile umutumwa Yoane ati: “Swemo tukalanga kutemwa kuno twatemwa Leza pa kuyela masunde yakwe. Na masunde yakwe angupale.”—1 Yoane 5:3.

19. U mulandu ci uno mutalinzile ukuvwila intete ukuipeela kuli Leza?

¹⁹ Cisipiliula ukuti suka mwaya amaliilike alino mungaipeela kuli Yeova. Yeova wamanya ningo vino mwaya, nupya wene atanga amunene ukuti muombe vino mutanga mukwanisye. (Masamu 103:14) Akalondesya ukuti mwaomba ningo, nupya alaamusakamala nu kumwavwa lyonsi. (Ezaya 41:10) Nga mwataila Yeova nu mwenzo winu onsi, icacumi mutalatwisika ukuti ‘alaamulanga muno mungacitila pe.’—Mapinda 3:5, 6.

NGA MWAWATIZIWA ALINO MUNGALANGIZYA UKUIPEELA KWINU

20. I cani cino ukuipeela kuli Yeova kutafwile ukuya ukwakulanda sile pa kanwa?

²⁰ Ukwelenganya pa vintu vino twasambilila penepo, kungamwazwa ukuti mupingulepo ukuipeela kuli Yeova umwipepo. Wensi uwatemwa Leza alinzile nu kulanda uku yantu yonsi pali vino Leza alatuula antu. (Loma 10:10) Nomba mungacita uli vivyo?

21, 22. Uzye mungacita uli pa kulangizya paswe utailo winu?

²¹ Lino mwapingulapo ukuti mukulonda ukuwatiziwa, mufwile ukumanyisya kalemanya wa mwiumba lyakwe ya eluda mu cilongano cino mwayamo. Aliwe alapekanya ukuti mukalanzyanye na ya eluda yamwi apa mauzyo yamwi-yamwi aakalanda pa visambilizyo vya muli Baibo. Ya eluda yaa ndi yaca yalola ukuti mwati mulinga ukuwatiziwa, yalamumanyisya ukuti mulawatiziwa apa ukongano uli nu kuyako.a Ilyasi ilya kupitulukamo muli vino uluwatizyo lukapiliula, likalandwa paapa kwene pa ukongano. Nga alino kalanda wilyasi aneena aakuya uku kuwatiziwa kuti yimilile pakuti yaasuke amauzyo yaili angupale pakuti yalangizye apaswe utailo wawo na vino yaaipeela.

²² Uluwatizyo u lukalangizya ukuti mwemo mwaipeela kuli Leza, nu kuti lyene mwemwe Nte yakwe Yeova. Yano yakuwatiziwa ya kayatuwika umwili onsi mu manzi pakuti cimanyikwe apaswe ukuti iyaipeela kuli Yeova.

UPILIULO WA KUWATIZIWA KWINU

23. Uzye ukuwatiziwa “umwi zina lyakwe Tata, ni lya Mwana, ni lya mupasi wamuzilo” kwalola mwi?

²³ Yesu walanzile pa yasambi yakwe ukuti yalawatiziwa, “umwi zina lyakwe Tata, ni lya Mwana, ni lya mupasi wamuzilo.” (Mateo 28:19, NW) Cii cikusenula ukuti wino akuya uku kuwatiziwa ala wamanya icifulo cino Yeova wakwata na cino Yesu Klistu wakwata. (Masamu 83:18; Mateo 28:18) Nupya wamanya vino umupasi wamuzilo wakwe Leza ukaomba.—Galatiya 5:22, 23; 2 Petulo 1:21.

24, 25. (a) Uzye uluwatizyo lukapiliula cani? (b) Iiuzyo ci ililaasukwa umu cipande ca kusyalikizyako?

²⁴ Nomba, uluwatizyo asi kutuwikwa sile umu manzi. Lukasenula icintu cimwi icicindame sana. Lino yakutuwika umu manzi ala capiliula ukuti wafwa ku vintu viipe vino wacitanga. Lyene ndi yakufumya, ala capiliula ukuti watuutulukila uku kucita ukulonda kwakwe Leza. Mulinzile nu kwiusya ukuti mwaipeezile kuli Yeova Leza, asi ku milimo, nupya asi ku muntu ali wensi nanti ukwiuvi, awe. Kuipeela nu kuwatiziwa i ntendekelo sile yakukomya sana ucuza winu na Leza—ucuza wampomvu.—Masamu 25:14.

²⁵ Asi ukuti nga mwawatiziwa ala casila mulapusuka. Umutumwa Paulo walemvile ati: “Twalililini kuomba mu coopo nu kuzakaza kuti mufikilizye ufyusi winu.” (Filipi 2:12) Uluwatizyo uutandiko sile. Uzye lyene, mungacita uli pakuti mwikale umu kutemwa kwakwe Leza? Cipande cakusyalikizyako umwibuku kwene lii cilaasuka iuzyo lii.