Uzye Antu Aafwa Cilaya Uli?

1. Ilyasi lisuma likati uli pa yantu afwa?

Lino Yesu wafisile pa muzi pa Betani, mupipi na Yelusalemu, wazanyile ukuti cuzakwe Lazalo wafwa, papita na manda yani (4). Lyene Yesu wasenzile Malita na Maliya, yakaci yako Lazalo nu kuya kuno yazisile kalume wawo. Papo kwene, na antu yakongana. Alino Yesu watutulwile Lazalo. Malita na Maliya yazangile ndi uli!—Welengini Yoane 11:21-24, 38-44.

Malita wene wamanyile mpiti vino ilyasi lisuma likalanda pa yafwe. Wamanyile ukuti Yeova alatutulula afwe pa kuti yace yikale nupya pa mpanga ya pansi.—Welengini Yobo 14:14, 15.

2. Uzye antu afwa yaya uli?

Antu yaumvilwe uku lukungu. (Utandiko 2:7; 3:19) Fwe yantu asi fwefwe mipasi iyaya mu miili ya munyefu. Nga twafwa, kusi cimwi icikasyala icipuma. Lyonsi lino umuntu wafwa, ala nu wongo kwene wafwa, nu kwelenganya konsi ala kwasila. Ali cino nanti a Lazalo kwene atiizile asimika vino waile-azana lino wafwile, pano antu afwa yatamanya nanti kamwi.—Welengini Masamu 146:4; Kasambilizya 9:5, 6, 10.

Uzye Leza akacuzya antu afwa umu moto? Baibolo ikasambilizya ukuti antu afwa yatamanya nanti kamwi. Fwandi, icisambilizyo ca kuti kwaya umoto wa pe, uufi uno ukazewanya sile Leza. Kapya Leza akaumvwa nu winyi ndi umvwa ivyakucuzya antu mu moto.—Welengini Yelemiya 7:31.

Tambini vidyo ya kuti Uzye Afwe Yaya Uli?

3. Uzye antu afwa yangatuvwanzya?

Antu afwa yatanga yavwange, nupya yatanga yuvwe nanti cimwi. (Masamu 115:17) Nomba kwayako angeli yamwi aipe angeleuzya umuntu wafwa pa kuti yavwanzye antu. (2 Petulo 2:4) Yeova asilonda kuti antu yavwanzya afwe.—Welengini Malango 18:10, 11.

4. Uzye aaweni alatutuluka?

Mintapendwa ni mintapendwa ya antu yano yali mu malindi yalatutuluka pa kuti yace yikale pano nsi. Na yamwi atamanyile Leza, akuti yacitanga ni vintu viipe, nayo kwene yalazyuka.—Welengini Luka 23:43; Milimo 24:15.

Yonsi alatutuluka yalasambilila icumi pali Leza, nupya yalauvwila Yesu pa kulangizya ukuti yamutaila. (Umbwilo 20:11-13) Yonsi alatutuluka, ndi yalaacita ivintu visuma, yalaaipakizya uumi wa pe pa mpanga ya pansi.—Welengini Yoane 5:28, 29.

5. Nga lyene vino Yeova alatutulula antu, tungati wene waya uli?

Leza watumile Umwanakwe ukwiza-tufwila pa kuti antu yano yafwa yakatutuluke. Fwandi tungati Yeova alatutulula antu pano uwa lukundo napya uwa cikuuku. Uzye mwemo mukalondesya kuti mukalole yaweni lino afwe yalazyuka?—Welengini Yoane 3:16; Loma 6:23.