Mungacita Uli pa Kuti Leza Aye Cuza Winu?

1. Uzye Leza akaumvwa mapepo yonsi?

Leza akaama antu yonsi kuti yapepa kuli aliwe pa kuti aye cuza wao. (Masamu 65:2) Nomba, asi mapepo yonsi yano akaumvwa nanti ukuzumila. Acino atangaasukile ni pepo lya muntu wino akacuzya umuci. (1 Petulo 3:7) Avino cali nu ku ina Izlaeli; lino yatwalilile ukucita iviipe, Leza watile ukuvwa mapepo yao. Fwandi, ukuvwanga na Leza i syuko lino tutalinzile ukulekelezya. Nomba, Leza wene akazumila na mapepo ya antu yano yakaifya ukuluta, ndi cakuti yalapila.—Welengini Ezaya 1:15; 55:7.

Tambini vidyo ya kuti Uzye Leza Akauvwa Mapepo Yonsi?

2. Uzye tulinzile ukucita uli pa kupepa?

Nga tukupepa kuli Yeova, ala tukuti a Leza witu. Fwandi tufwile ukupepa kuli aliwe wenga sile. Yeova ali Leza wa cumi, kutaya na muze, napya ali Kaumba witu. (Mateo 4:10; 6:9) Nakupya, swemo tutamalilika, acino tulinzile ukupepela umwi zina lyakwe Yesu pano aaliwe watufwilile kuti atukulule ku maifyo itu. (Yoane 14:6) Yeova asilonda kuti twamuvwanzya ukuomvya mapepo akusungila nanti yano yalembela limwi mu tuma buku. Akalonda twamuneena ivili mu myenzo itu.—Welengini Mateo 6:7; Filipi 4:6, 7.

Kaumba witu akauvwa na lino tukulandila sile umu mwenzo. (1 Samueli 1:12, 13) Akatuneena ukuti tungapepa kuli aliwe pa nsita ili yonsi. Tungapepa lino twazyuka, na pa kusendama, pa kulya, nanti sile lino tuli na mavya.—Welengini Masamu 55:22; Mateo 15:36.

3. U mulandu ci uno Aina Klistu yakalonganila pamwi?

Ukuya cuza wakwe Leza, catala, pano antu aingi yatataila Leza, nupya yakati na vino watulaya ukuti alaleta umutende pano nsi, vitalacitika. (2 Timoti 3:1, 4; 2 Petulo 3:3, 13) Fwandi cikalondeka ukulakomelezyanya na anji yano tukapepa nayo.—Welengini Ayebulai 10:24, 25.

Kulacinila pamwi na antu aatemwa Leza, cikatwavwa ukupalamila kuli Leza. Pa kulongana kwa Nte Zyakwe Yeova ali pano pakaaya ukukomelezyanya na anji akwata utailo.—Welengini Loma 1:11, 12.

4. Mungacita uli pa kuti Leza aye cuza winu?

Nga mukulonda kuti Leza aye cuza winu, mufwile ukulaelenganya sana pa vintu vino mukusambilila muli Baibolo. Lino mwasambilila pa milimo yakwe, na vino akatupandako mano, alino na pa vintu vino akatulaya, mwayuzya mweeneco muti, ‘uzye ivintu vii vikunsambilizya cani?’ Lino tukwelenganya pa vintu vii, twaikapo ni ipepo, alino tulalola ukuti Leza watutemwa, napya u wa mano.—Welengini Yoswa 1:8; Masamu 1:1-3.

Pa kuti Leza aye cuza winu, mufwile ukumutaila. Nomba, ukutaila kwakolana nu mwana wino akalondeka ukuliisya ivyakulya. Utaailo nao ukalondeka ukuliisya insita yonsi; kuli kuti lyonsi mufwile ukulaelenganya pa vintu vino vyalenzile kuti mutaile.—Welengini Mateo 4:4; Ayebulai 11:1, 6.

5. Uzye nga mwaya cuza wakwe Leza, cilaya uli?

Yeova akasakamala antu yonsi yano yamutemwa. Angayacingilila uku vintu ivikuyacuzya, vino vingayononela utaailo wa kwikala amanda pe. (Masamu 91:1, 2, 7-10) Akatuneena ukuti tutaacitako ivintu vimwi ivingatulwalika nu kutuletela ulanda. Yeova aaliwe akatusambizya vino tungaisunga fweeneco.—Welengini Masamu 73:27, 28; Yakobo 4:4, 8.