ISAMBILILO 4
Umukazyana Uwazanzizye Isi na Yeova
Uulayo ci uno Yefuta walavile kuli Yeova?
Mwana Yefuta wacisile ukulingana na vino isi walavile Yeova, lelo citangupiile foo
Uzye watumulola umukazyana aali apa cikope?— U mwana mukazyana wakwe Yefuta. Baibo itaalanda izina lyakwe, lelo cino twamanya sile i cakuti wazanzizye isi na Yeova. Leka tusambilile apa mukazyana wiiyo alino na pali isi, Yefuta.
Yefuta wali umuntu umusuma sana, nupya insita ikulu waomvyanga uku kusambilizya umwanakwe umukazyana pali Yeova. Nupya Yefuta wali u monsi uwa maka kapya wali intunguluzi isuma. Fwandi, aina Izlaeli yamuneenyile ukuti ayatungulule uku kulwisya alwani yao.
Yefuta wapefile kuli Leza pakuti ace amwazwe ukucimvya. Yefuta walavile Yeova ukuti ndi wacimvya, wali nu kupeela Yeova umuntu uwali nu kutandikilapo ukufuma umu ng’anda lino alaawela ukufuma uku ulwi. Umuntu wiiyo wali nu kuya-ikala api tenti lya kupepelapo nu kutandika ukuombela Yeova papakwene amanda yonsi. Itenti aali pano antu yaayanga uku kupepela Leza umu manda ya ina Izlaeli. Avino Yefuta waile-acimvya ulwi! Uzye watuumanya uwatandikiilepo ukufuma umu ng’anda lino Yefuta wawezile?—
U mwana wakwe umukazyana! Wiyakwene aaliwe wali umwanakwe wenga mpo, lelo walondekwanga ukumutwala uku ng’anda ya kupepelamo. Cintu cii calenzile aye nu ulanda iciipisye. Nomba, iusya ukuti avino walavile. Liili kwene sile, umwana wakwe walanzile ati: ‘Tata, mwalavile Yeova ukuti mulacita vivyo, fwandi mulinzile ukufikilizya ulayo.’
Ivyuza vya mukazyana wii mwana Yefuta, vyayaanga uku kumutandalila cila-mwaka
Umwana wakwe Yefuta umukazyana nawe kwene wali nu ulanda. Api tenti lya kupepelapo pano wikalanga, ataali nu kutwalwa alino nu kukwata ana. Nomba, walondesyanga ukuti isi afikiilizye ulayo uno walavile, nupya walondanga ukuzanzya Yeova. Kuzanzya Yeova ali cintu cino wisileko sana amano ukuluta ukutwalwa nu kukwata ana. Fwandi wasiile yalupwa, ayatandika ukwikala api tenti lya kupepelapo Yeova amanda yonsi.
Uzye icintu cino wacisile cisikukulanga ukuti wazanzizye isi na Yeova?— Ee, wayazanzizye! Ndi cakuti naawe waya ni cuvwila nu kutemwa Yeova, ulaya wa mukazyana mwana Yefuta. I cumi kwene ulazanzya avyazi yako, na Yeova kwene alazanga cuze.