Mwaya Acisinka Kuli Yawinu

Yeova akalonda ukuti twaya “acisinka.” (Mika 6:8, NW) Kuya ni cisinka mu cupo kwacindama sana, pano nga pasi ali ni cisinka, kusiya nu kutailana. Nakupya utailo wacindama sana pakuti kutemwana kwakulilako.

Ndakai kuya ni cisinka mu cupo kukuceepelako sile. Fwandi mulinzile kucita ivintu viili pa kuti umu cupo cinu mutaaya mavya.

1 MWACINDIKA ICUPO CINU LYONSI

BAIBO IKATI: “Mwamanya kusolola ivili visuma.” (Filipi 1:10) Icupo cinu caya pa vintu ivicindame sana. Mufwile ukucicindika sana lyonsi.

Yeova akalonda ukuti mwaika sana mano kuli ya iya inu nanti aci inu ukuti ‘mwailyokezya’ mwensi pamwi. (Kasambilizya 9:9) Walanda ningo sana ukuti mutalinzile kutazyela yawinu, lelo akati mwensi mweili mulinzile ukuombesya pakuti mwazanzyanya. (1 Kolinto 10:24) Mwaleka yawinu yailola ukuti mwayatemwa nupya yakalondekwa.

VINO MUNGACITA AEVI:

• Mwasininkizya ukuti insita iikulu mukuya nayo, nupya lyonsi kwene mwayasumbako sana amano

• Lyonsi mwalanda ukuti “fwefwe” mutalaanda ati “nene”

2 MWASUNGA UMWENZO WINU

BAIBO IKATI: “Wino wensi uwalolekesya umwanaci nu kumukumbwa, wene ala walongozya nawe mu mwenzo.” (Mateo 5:28) Ndi umuntu umwi watandika ukwelenganya pa ulalelale, ala u muntu wiyo asi uwa cumi kuli iya nanti kuli mamakwe.

Yeova akalanda ukuti “uwasunga mwenzo wako.” (Mapinda 4:23; Yelemiya 17:9) Pa kucita vii mulinzile kusunga ilinso linu. (Mateo 5:29, 30) Mwakolanya Yobo, wino wapangine na manso ukukana-kumbwa mama na muze kuluta pali wino wakweti. (Yobo 31:1) Mutaezya ukutamba ivikope vya uzelele. Nupya mutaezya kulangizya yauze icitemwiko cino mufwile ukulangizya yawinu.

VINO MUNGACITA AEVI:

• Mwalangizya ku yantu ukuti mwasumba mano sana kuli ya winu

• Mwamanya ningo vino yawinu yaaya, alino lyene zuwa-zuwa imutaluka ivyuza vino vingalenga ya iya inu nanti aci inu kwipilwa ku mwenzo