CIPUTULWA 9
Mwensi Apa Ng’anda Mwapepela Yeova Pamwi
“Pepini wino uwaumvile iyulu ni nsi.”—Umbwilo 14:7
Wakwe vino mwati-musambilila umu kabuku kaa, muli Baibo mwaya ivyeo ivingi sana ivingamwazwa pamwi nu lupwa lwinu. Yeova akalonda ukuti muye ni nsansa. Walaya ukuti ndi pa vintu vyonsi mwakolezya ukumupepa, “alamupeela vintu vii vyonsi.” (Mateo 6:33) Akalondesya ukuti muye cuza wakwe. Mwaezya na maka pakuti mwalukuya cuza wakwe Leza. Ukuya cuza wakwe Leza, ali syuko ilyakulisya lino umuntu angakwata.—Mateo 22:37, 38.
1 MWAKOMYA UCUZA WINU NA YEOVA
BAIBO IKATI: “‘Ndaya so, namwe mulaya ana yane aonsi na yakaci,’ avino Mwene wamaka yonsi walanda.” (2 Kolinto 6:18) Leza akalonda ukuti muye sana cuza wakwe. Ipepo lingamwazwa ukuti muye sana cuza wakwe Leza. Yeova akumulaalika, akuti “pepini insita zyonsi.” (1 Tesalonika 5:17) Akalondesya ukuvwa ivili uku mwenzo winu ni vikumusakamika sana. (Filipi 4:6) Ndi mukupepela pamwi nu lupwa, yonsi apa ng’anda yalaalola ukuti i cumicumi Leza acuza winu.
Na cuze cino mulinzile ukucita, u kuvwa vino Leza akumuneena. Munguvwa vino Leza akumuneena lino mukuisambilizya Izwi lyakwe Leza nu kuwelenga impapulo izikalanda pali Baibo. (Masamu 1:1, 2) Mwaelenganya sana pali vino mukusambilila. (Masamu 77:11, 12) Ukuvwa vino Leza akumuneena, kukalondekwa nu kuti mwazanwa lyonsi umu kulongana.—Masamu 122:1-4.
Ukuneenako antu yauze pali Leza nayo iinzila iyacindama sana iingalenga muye sana cuza wakwe Leza. Lino mukulanda sana pali Leza, alino mulaayuvwa sana ukuti wene a cuza winu.—Mateo 28:19, 20.
VINO MUNGACITA AEVI:
Mwapatula insita ya kuwelenga Baibo cila-wanda nu kupepa lyonsi kuli Leza
Mwensi kwene apa ng’anda mwakolezya vyakwe Leza, ukuluta ukusumba sana mano uku vintu vya kuizanzya
2 MWAIPAKIZYA UKUPEPA KWA LUPWA
BAIBO IKATI: “Mupalame kuli Leza, nga nawe amapalama kuno muli.” (Yakobo 4:8) Mufwile ukutantika uwanda na vino mulaasambilila pa kupepa kwa lupwa nu kulondela vivyo kwene lyonsi. (Utandiko 18:19) Nomba, i vingi ivikalondekwa. Mulinzile ukwiusya Leza cila-wanda. Mwakomya ucuza wakwe yonsi apa ng’anda lino mukulanda pali aliwe “lino mutenzi pa ng’anda, lino muli pa lwendo lino mukupuza na lino mukuomba.” (Malango 6:6, 7) Mwaezya na maka ukukolanya Yoswa, uwalanzile ati: “Lelo nemo na amu ng’anda yane, tumatumikilanga Yawe [“Yeova,” NW].”—Yoswa 24:15.
VINO MUNGACITA AEVI:
Muce mutantike vino mulaasambilila ivingavwa mwensi cila-muntu apa ng’anda