CIPUTULWA 5

Welini Kuli “Kacema Nupya Kacingilila Winu”

Uzye namwe pali intanzi yonga nanti zingi izyati zilandwa umu kabuku kaa izyamucitikilapo? Ndi cakuti zyamucitikilapo, asi mwemwe mwenga. Aomvi yakwe Leza aingi aali nu utailo alumbulwa muli Baibo kumwi na a ndakai kwene nayo kwene yapita umu ntazi zizyo. Yeova wayavwile ukucimvya intazi zino yakwatanga, fwandi namwe kwene angamwazwa wakwe vivi kwene vino wayavwile.

Ndi cakuti mwawela kuli Yeova, nawe alapalama kuli mwemwe

MWAIUSYA ukuti ndi cakuti mwawela kuli Yeova, nawe alapalama kuli mwemwe. Alamwazwa ukucimvya masakamika, kukana uvwa uyi, nupya mulaya nu mutende alino na kampingu isanguluke. Lyene cii cilalenga ukuti mwalondesya ukutandika ukuombela Yeova capamwi na ya kapepa yauzo. Ndi mwacita vivyo cilaya kwati avivi vino cali ku Ina Klistu yamwi aali umu nsita ya atumwa yano Petulo walembiile ukuti: “Mwemo mwakoline wa mfwele ziponge, lelo ndakai Leza wamuwezya kuli kacema nupya kacingilila winu.”—1 Petulo 2:25.

Kuwelela kuli Yeova aali cintu cicindamisye cino mungacita. U mulandu ci? Pano ndi mwacita vivyo mulazanzya Yeova. (Mapinda 27:11) Wakwe vino mwamanya, Yeova akauvwa wakwe vino tukauvwa, fwandi vino tukacita vingalenga ukuti atemwe nanti foo. Kwene icacumi, Yeova asitupatikizya ukuti tumutemwe nupya twamuombela. (Malango 30:19, 20) Umonsi umwi uwasambilila vyakwe Baibo wene walanzile ukuti: “Kusi angapatikizya umuntu ukuombela Leza. Afwile ukuitandikila sile umwineco.” Tungasoolola ukuombela Yeova ndi cakuti tukuitemelwa ukumupepa nu mwenzo onsi. Ndi cakuti tukucita vivyo ala tukumupeela uwila ucindamisye kuli kuti—ukaele witu—nupya ala tukulenga Yeova ukuya nu luzango ulukulu cuze. Cumi kwene kutaya icintu cino tungalinganya uku nsansa zino tukakwata ndi cakuti tukupepa Yeova uwalinga ukupepwa sile wenga.—Milimo 20:35; Umbwilo 4:11.

Nkazi uwali umutonte yakumuzengela ku ina na yankazi amu cilongano

Nacuze i cakuti ndi mwatandika nupya ukupepa Leza, mulasambilila ivingi pali aliwe vino mukalondekwa ukumanya. (Mateo 5:3) U mulandu ci uno twalandila vivyo? Antu aingi muno nsi yakauzya ukuti: ‘U mulandu ci uno twayela pano nsi?’ Yatamanya masuko ku mauzyo aakalanda umulandu uno twayela nu umi. Antu yakalondesya sana ukumanya masuko pano Yeova u wayapeezile umi kwene uwo. Watupanzile kuti twaya nu luzango lino tukumuombela. Kusi cimwi icingatulenga ukuya nu luzango ukucila pa kumanya ukuti tukapepa Yeova nu mwenzo onsi.—Masamu 63:1-5.

Fwandi mulinzile ukumanya ukuti Yeova akaalondesya ukuti muwele kuli aliwe. Mungasininkizya uli vivyo? Tale elenganyini pa kabuku kwene kaa: Pakuti kapangwe, kwali ukupepelapo kuli Yeova. Umwi wizile amuletela kabuku kwene kaa, limwi umuntu wiyo wali a eluda nanti kapepa muzo aliwensi. Lyene mwatandike ukukawelenga pakuti mulondele amazwi ali umu kabuku kwene kaa. Fwandi vyonsi vii vikulangilila ukuti Yeova atamwilila foo. Akulonda ukumwazwa ukuti muwele kuli aliwe.—Yoane 6:44.

Tukakomeleziwa wakwe cimwi ukumanya ukuti Yeova asyailila aomvi yakwe aafuma umu cilongano. Vikwene ali vino nkazi uwi zina lyakwe Donna wazumiile. Walanzile ukuti: “Natandike ukupumbuka panono panono, lelo ilingi nelenganyanga sana pa Masamu 139:23, 24, apaya mazwi yakuti: ‘Ncecete, we Leza, ulole umwenzo wane, unjezye pakuti umanye vino nkaelenganya. Lola ndi cakuti nimpita umu nzila iipe, ntungulule umu nzila ya umi wape.’ Namanyile ukuti ntali uwa muno nsi pano imiyele ino naaweni aantu ya muno nsi yali nayo itali isuma; nupya namanyile ukuti mfwile ukuya sile umwi uvi lyakwe Yeova. Natandike ukwiluka ukuti fwandi Yeova atanjilile; nalondekwanga sile ukuwela kuli aliwe. Naya nu luzango wakwe cimwi pano vikwene ali vino nacisile!”

“Natandike ukwiluka ukuti fwandi Yeova atanjilile; nalondekwanga sile ukuwela kuli aliwe”

Namwe kwene tukumupepela ni myenzo iitu yonsi ukuti mukaye nu luzango luno Yeova akapeela nupya kwene. (Neemiya 8:10) Ndi mwaswilila kuli Yeova mulaya ni nsansa cuze.

Masuko ku Mauzyo Yano Antu Aakulonda Ukuwela Kuli Yeova Yakauzya

NAMATANDIKILA PI?

Umuntu uwakuti wali umulwale angatandika kupola nu kukwata amaka panono panono. Fwandi na pakuti mukome muli ukapepa, mulinzile kutandika ukuisambilizya vyakwe Leza panono panono. Mutaalola kwati mufwile ukusambilila vyonsi pa muku onga. Limwi pa nsita sile ilinge mungaawelenga nanti kukutika mazwi yano yakopa amuli Baibo, kuwelenga impapulo zimwi nanti sile kuwelengako ivyeo vino iika pali Webusaiti wako ya Nte. Napya cingazipa nga mwamba ukulazanwa nu ku kulongana. Ni cacindama sana u kulapepa kuli Yeova pakuti aamwazwa. Mwaika “masakamiko inu pali Leza, pano wene akamusakamala.”—1 Petulo 5:7.

Ya Eeva yasimika ukuti: “Lino natile ukulongana nu kusimikila nuvwanga ni nsonyi zya kupepa kuli Yeova. Wanda umwi lino nasifile ukupepa kuli Yeova, ali wanda uno na Eluda wantandalile, wangazwilizye ukumanya ukuti Yeova wansumbako mano. Eluda wiyo wankomelizye ukuti nawelenga Baibo lyonsi. Lino natandike ukucita vino wangazwizye calenzile kuti ntandike nu kulongana. Patalengile avino natandike nu kusimikila nupya. Naya ni nsansa pa kuzana ukuti Yeova atandekelizye.”

UZYE AMU CILONGANO YALANDOLA ULI?

Kwaula nu kutwisika amu cilongano yalamupokelela ningo. Mu nsita yakuti yamunenola nu kumukalipila, yene yalamulanga ukutemwa napya yalamukomelezya.—Ayebulai 10:24, 25.

Ya Javier yasimika ukuti: “Nali ni nsonyi zya kuswilila ku Ng’anda ya Wene. Nali umusakamale pali vino anji yali nu kuyalanda. Nkazi umwi umukoloci lino wambweni naya umu kulongana ale paapita ni myaka 30, walanzile ati, ‘Wacita ningo sana, we mwana we!’ Ala natemilwe wakwe cimwi. Yampokelile ningo sana.”

Ya Marco nayo yasimika ukuti: “Lino naswilile uku Ng’anda ya Wene, naile inikala ku cilimba ca kucisila pakuti amu cilongano yatandola. Nomba aingi yanjiwisye nanti cakuti lino natile ukuyako nali mwance. Yampokelile ningo nupya yankumbatile icakuti nayuvwile ukwangukilwa. Cali kwati nalondoka pa ng’anda.”

UZYE YA ELUDA YALANGAZWA ULI?

Ya eluda yalamulanga icikuku. Yalamutaizya pa kulola ukuti mu kulonda ukuya nu kutemwa kuno mwali nako “inkolelo.” (Umbwilo 2:4) Yalamwazwa ukuombela pa wavya uno mwali nao, napya yalaya a “mutembo.” (Galatiya 6:1; Mapinda 28:13) Ya eluda yalatantika nu kuti umwi amutungulula isambililo, kuomvya ibuku lyakuti Palameni Kuli Yehova nanti lyakuti “Ikalini mu Kutemwa Kwakwe Leza.” Manyini ukuti ya eluda yalamutekezya napya yalamutungilila muli vyonsi.—Ezaya 32:1, 2.

Ya Victor aatile ukusimikila nu kulongana pa myaka 8 yasimika ukuti: “Ya eluda yatatile ukuntandalila. Uwanda umwi, eluda wantambisizye mapikica yano watukofile. Na ci calenzile niusye ivisuma ivyacitikanga, fwandi natandike ukulondesya ukuya ni nsansa zino naipakizyanga lino naombelanga Yeova. Ya eluda yangazwilizye ukutandika ukuombela Yeova napya.”

Alamwazwa Ukuya Akome

Mwi buku lya nyimbo ilyakuti Katwimbile Yeova, mwaya inyimbo izingi izisuma cuze izingamutekezya nu kumukomelezya lino mukutwalilila ukuomba imilimo yakwe Leza. Elenganyini amazwi aya umu lwimbo namba 60. Amazwi aaya umu lwimbo luu yafuma pali 1 Petulo 5:10, nupya lwakwata umutwe wakuti “Alamwazwa Ukuya Akome.”

Kwali cino Leza wamufumizizye

Mu mfinzi kuti mumanyi cumi.

Wamanyilu kuti umu mwenzo winu

Mwalondanga kuti mumumanye.

Mwamulailu kumuombela;

Wamwavwile nupya alamwazwa.
Leza watumile nu Mwanakwe kuti

Amufwile mukaye nu umi.

Ndi cakuti Leza wamupiilu Mwana,

Fwandi mwataila alamwazwa.

Atange ilile utailo

Nu kutemwa kuno mwaya nako.

(MAZWI YA KUSWILIZYAPO)

Leza wamukazile nu wazi wa Mwana.

Alamwazwilizya, nupya ‘lamukomya.

Alamutungulula, mulacingililwa.

Alamwazwa lyonsi, nupya ’lamukomya.

Pakuti muvwe vino yiimba ulwimbo luu alino ni nyimbo zyuze izya Wene mu ndimi zipusane-pusane, mucite sikani kakodi nanti muyule pa jw.org.