Yakobo Wapokelela Ica Upyanyi

Isaki wali ni myaka 40 lino watwazile Labeka. Wamutemilwe sana. Lino papisile insita, yakweti ana yaili alumendo ya mpundu.

Umwana umukalambapo wali a Esau, nu mwancepo nawe wali a Yakobo. Esau watemilwe ukufuma pa ng’anda, nupya wamanyile ukulunga inyama. Lelo Yakobo wene wikalanga pa ng’anda.

Pa nsita iya, umwana umukalambapo yamupeelanga impanga ni vyuma ndi cakuti isi wafwa. Vii ali vino yaamanga ukuti ca upyanyi. Pali vino aa mulupwa lwakwe Isaki yali nu kupyana, pali na malayo yano Yeova walavile Abulahamu. Esau atisileko mano ku malayo yayo, lelo Yakobo wene wamanyile ukuti yali acindame sana.

Wanda umwi lino Esau wafumile umu kulunga wawezile pa ng’anda ala watatonta sana. Lino uvwile ivyakulya ivisuma sana vino Yakobo welekanga vikununkila, walanzile ati: ‘Inuvwa inzala! Mpeko musunyi uyenzu.’ Yakobo nawe watile: ‘Nimakupeela ndi cakuti wandaya ukuti ndapeelwa ica upyanyi cako.’ Esau watile: ‘Ntasakamile pa ca upyanyi cico! Cilaya icako. Nemo nkulonda sile ukulya.’ Uzye ukwelenganya ukuti cino Esau wacisile cali sile ningo? Awe, citali ningo. Esau wapeezile icintu cimwi cicindame pa mulandu sile nu musunyi.

Lino Isaki wakosile, insita yafisile iyakuti apaale umwana umukalambapo. Lelo Labeka wazwilizye Yakobo umwana umunonopo ukupokelela ipaalo. Lino Esau wamanyile ukuti Yakobo watapokelela ipaalo, wasosile sana icakuti walondanga nu kumukoma. Isaki na Labeka yalondanga ukucingilila Yakobo, fwandi yamunenyile ati: ‘Yanga kikale kuli Labani nyokolume, kufikila lino Esau wawezya umwenzo.’ Yakobo uvwiliile vino avyazi yakwe yamunenyile nupya wapuswisye umi wakwe.