Yatacisile Ukulingana na Vino Yalavile

Yeova waneenyile Mose ati: ‘Iza uku mwamba. Ndalemba masunde pa mawe apapaatale nu kukupeela.’ Mose waile uku mwamba nupya wikazileko manda 40. Lino wali kuuku, Yeova walemvile Masunde 10 pa mawe yaili nu kumupeela.

Lino papisile insita, Aina Izlaeli yatandike ukwelenganya ukuti Mose watayasya. Yaneenyile Aloni iyati: ‘Tukulonda uwakuti aatutungulula. Tupangile Leza.’ Aloni watile: ‘Mpeelini goldi winu.’ Wasungulwile goldi wiyo nu kupangamo kana ka ng’ombe. Antu yalanzile iyati: ‘Akana ka ng’ombe kaa, ali Leza witu uwatufumizye umu Ijipti.’ Yatandike ukuzevya nu kupepa kana ka ng’ombe kakwe goldi. Uzye cifile kucita vivyo? Ee, pano antu yalavile ukuti yalaapepa Yeova wenga sile. Nomba yafizilwe ukufikilizya vino yalavile.

Yeova waweni ivyacitikanga, nupya waneenyile Mose ati: ‘Swilila uku Ina Izlaeli. Iyata ukunguvwila nupya ya kupepa leza wa ufi.’ Mose wafumile uku mwamba, ala watasenda na mawe yaili apali amasunde.

Lino Mose wapalamile uku nkambi, uvwile antu yakwimba. Lyene waweni ya kucina nu kupepa akana ka ng’ombe. Mose wasosile sana. Wasumvile amawe yaili apali Masunde, iyatamoka. Papo kwene sile, wononyile kana ka ng’ombe. Lyene uzizye Aloni ati: ‘I vyani vino antu iyacita pakuti yalenge ucite cintu cii cipisye?’ Aloni walanzile ati ‘Utasoka. Wamanya vino antu yaa yaya. Yalondanga ukuyapangila leza, fwandi natoozile goldi wao nu kumoca mu moto nu kupangamo kana ka ng’ombe.’ Aloni ataali nu kucita vino wacisile. Mose waswilile uku mwamba nu kuyapaapata kuli Yeova kuti aeleele antu.

Yeova welezile yayo aitemilwe ukumuvwila. Uzye watulola umulandu uno cacindamile uku Ina Izlaeli ukulondela utunguluzi wakwe Mose?