Itenti Lya Kupepelapo

Lino Mose wali uku Mwamba uwa Sinai, Yeova wamuneenyile ukupanga i cintu ciiyele, cino yaamanga ukuti itenti lya kupepelapo, kuno Aina Izlaeli yaali nu kulamupepela. Yali nu kulasenda itenti lya kupepelapo lyonsi lino yakuuka.

Yeova walanzile ati: ‘Neena antu yapeele ivili vyonsi vino yangakwanisya pa kwazwilizya ukupanga itenti lya kupepelapo.’ Aina Izlaeli yapeezile goldi, siuva, mukuwa, mawe ya mutengo, ni viyembelo. Nupya yapeezile kotoni itiswe, kotoni yako bulu, impapa izya nyama, alino ni vintu vyuze vingi. Yapeezile ivingi icakuti Mose wayanenyile ati: ‘Vyavula. Tiini ukuleta.’

Aonsi aingi na anaci amanyikisya imilimo yaazwilizye ukupanga itenti lya kupepelapo. Yeova wayapeezile amano aakuomba umulimo. Yamwi yapikulanga nu kusuma ivyakuzwala. Yauze nayo yatantikanga amawe, kupanga iviya vyakwe goldi ni vya mbao.

Antu yaapanzile itenti lya kupepelapo ukulingana na vino Yeova wayanenyile. Yaapanzile insalu iisuma ino isile umwi tenti lya kupepelapo iyapalukinye incende ziili, kuli kuti, mwa Muzilo, nu mwa Muzilo Kuluta. Umwa Muzilo Kuluta mwali mbokosi ya upangano iyapanzilwe ni mbao zya muti wa akasya na goldi. Umwa Muzilo mwali ca kutekapo inyali cakwe goldi, tebo nu ulambo apa kocela ivinunkile. Pa musolo pali ca kufulalilamo cino yapangiile nu mukuwa nupya pali nu ulambo ukulu. Imbokosi ya upangano iusyangako Aina Izlaeli pali vino yaalavile Yeova ukuti yaalamuvwila. Uzye watumanya vino izwi lyakuti upangano likapiliula? Likapiliula ukuti ulayo uiyele.

Yeova wasoolwile Aloni na ana yakwe ukuti yaomba umulimo wa usimapepo api tenti lya kupepelapo. Yaali nu kulalisakamala ningo nupya apano yaali nu kulapeelela mawila kuli Yeova. Aloni, uwali simapepo mukalamba, aliwe wazumiliziwe sile ukwingila umwa Muzilo Kuluta. Wingilangamo umuku onga pa mwaka pa kupeela ilambo lya kwelela imembu zyakwe, imembu zya lupwa lwakwe, ni membu zya luko lonsi ulwa Ina Izlaeli.

Aina Izlaeli yamazile ukupanga itenti lya kupepelapo lino papisile umwaka onga kufuma pano yafumiile umu Ijipti. Lyene yakweti incende ya kupepelapo Yeova.

Yeova walenzile ukuti ululumbi lwakwe luye umwi tenti lya kupepelapo ni kumbi livimbilikizye papela yi tenti. Ndi cakuti ikumbi litafumile api tenti lya kupepelapo, Aina Izlaeli iikalanga papo kwene. Lelo ndi cakuti ikumbi lyafuma api tenti lya kupepelapo, yamanyanga ukuti insita ya kutenuka yafika. Yaapangululanga itenti lya kupepelapo nu kukonka kuno ikumbi likuya.