Lahabu Wafisa Inengu

Lino inengu zya Ina Izlaeli zyaile umu musumba uwa Yeliko, zyaile izikala umu ng’anda iya mwanaci wi zina lyakuti Lahabu. Lino umwene wa ku Yeliko wamanyile, watumile asilika uku ng’anda yakwe Lahabu. Lahabu wafisile inengu ziili pi paala aneena na asilika ukuya uku ntunga yuze. Wanenyile inengu ati: ‘Nimamwazwa pano imanya ukuti Yeova ali namwe nupya mulacimvya impanga itu. Napaapata ndaini ukuti mulapususya ulupwa lwane.’

Inengu zyanenyile Lahabu iziti: ‘Twalaya ukuti pali yonsi alaya umu ng’anda yako kusi nanti awenga alacisika.’ Zyalanzile nu kuti: ‘Ukanyepe intambo iiyenzu pi windo, nupya ulupwa lwako lulapusuka.’

Fwandi Lahabu wafumizye inengu pi windo ukuomvya intambo. Zyaile uku myamba nupya zyaile zifisamako pa manda yatatu lino zitatala zyaswilila kuli Yoswa. Aina Izlaeli yalamvile Uluzi Lwa Yodani nupya yaipekinye ukupoka impanga. Musumba uwa Yeliko wali ali musumba uno yatandikilepo ukucimvya. Yeova wayanenyile ukuzinguluka umusumba umuku onga cila wanda pa manda 6. Uwanda uwalenga 7 wene, yazingulwike umusumba imiku 7. Ya simapepo yalizizye mapenga, nupya asilika nayo yapunzile apaapezile maka yao. Ali vino viumba ivya musumba uwa Yeliko vyaponyile. Lelo ing’anda yakwe Lahabu iyali uku viumba, yene itaponyile. Lahabu nu lupwa lwakwe yapuswike pa mulandu wakuti Lahabu wataile Yeova.