Yeova Wavwanga na Samweli

Eli Simapepo Mukalamba wakweti ana aonsi yaili aaombanga usimapepo api tenti lya kupepelapo. Mazina yao a Hofini na Finiasi. Yatuvwilanga masunde yakwe Yeova nupya yacuzyanga antu. Ndi cakuti Aina Izlaeli yaleta mawila aakupeela kuli Yeova Hofini na Finiasi, yaatolangapo inyama izisuma. Eli uvwile vino ana yakwe yacitanga, nomba ataacisilepo icili consi. Uzye Yeova wali nu kuleka vii vitwalilile ukucitika?

Nanti icakuti Samweli wali umwance sana pali Hofini na Finiasi, ataatazile acite iviipe vino yene yacitanga. Yeova watemilwe sana Samweli. Wanda umwi usiku ala Samweli wataalala, uvwile umwi akumwama. Wazyusile nu kuya kuli Eli amuneena ati: ‘Anene pano!’ Lelo Eli walanzile ukuti nsikukwama. Swilila umu kulaala.’ Lino Samweli waswilile umu kulaala nupya kwene uvwile umwi akumwama. Lino uvwile umwi akumwama umuku wakwe citatu nu kuyaneena Eli, Eli wilwike ukuti Yeova aliwe akwama Samweli. Fwandi wamuneenyile ati, ndi uvwa umwi wakwama nupya, uwasuke uti: ‘Yeova, vwanga. Umuomvi wako akuvwa.’

Samweli waswilile umu kulaala. Lyene uvwile umwi akumwama ati: ‘Samweli! Samweli!’ Nawe waswike ati: ‘Vwanga, umuomvi wako akuvwa.’ Yeova wamuneenyile ati: ‘Unene Eli ukuti ndamufulula pamwi nu ulupwa lwakwe. Wamanya ukuti ana yakwe yakacita iviipe api tenti lyane ilya kupepelapo, nomba asicitapo nanti acimwi.’ Wanda uwalondelilepo katondo Samweli wayuzile ivisaasa vi tenti lya kupepelapo, wakwe vino wacitanga lyonsi. Watiinyile ukuneena Simapepo Mukalamba vino Yeova wamuneenyile. Nomba Eli wamwamile nu kumuzya ati: ‘Mwanane, i vyani vino Yeova ali wakuneena? Neene vyonsi sile.’ Fwandi Samweli waneenyile Eli vyonsi sile.

Lino Samweli wakulanga, Yeova watwalilile ukuya nawe. Antu yonsi umu mpanga iya Izlaeli, yamanyile ukuti Yeova wasoolwile Samweli ukuya kasesema nupya kapingula.