Umwene Uwa Kutandikilako Umu Izlaeli

Yeova wapeezile Aina Izlaeli ya kapingula ukuti yayatungulula, nomba yene yalondanga umwene. Yanenyile Samueli iyati: ‘Antu yonsi aatuzinguluka yakwata aene. Naswe tukulonda umwene.’ Samueli waweni ukuti cii citali ningo, fwandi wapefile kuli Yeova. Yeova wamuneenyile ati: ‘Antu yatakanyile wewe. Lelo iyakana neene. Yanene uti yangakwata umwene, nomba umwene wiyo alaalonda ivintu ivingi kuli aliyo.’ Nanti wayanenyile vivyo, antu yalanzile iyati: ‘Swemo tutasakamile vivyo. Tukulonda umwene!’

Yeova waneenyile Samueli ukuti umonsi uwi zina ilyakuti Saulo aalaya umwene wa kutandikilako. Lino Saulo waile umu kutandalila Samueli uku Lama, Samueli wapasile Saulo ukuya umwene lino wamwitulwilile amafuta pa mutwe.

Pa cisila Samueli wamile Aina Izlaeli yonsi ukuti ayalange umwene wao. Nomba yatamanyile kuno Saulo wali. Uzye utumanya umulandu? Pano wafisime umu viya. Lino yamuzanyile, yamuleesile nu kumwimika pakasi ka yantu yonsi. Saulo wali umutali ukucila yonsi, nupya wali umusuma sana. Samueli watiile: ‘Lolini wino Yeova watasoolola.’ Antu yonsi yapunzile iyati: ‘Wikale amanda aingi mwene!’

Pa kutandika Umwene Saulo uvwanga kuli Samueli nupya uvwilanga na Yeova. Nomba wizile asenuka. Wakwe, umwene atazumiliziwe ukupeela amalambo. Apa nsita imwi, Samueli waneenyile Saulo kuti amulolele, nomba Samueli atiizile zuwa. Fwandi Saulo wapingwilepo ukupeela malambo. Uzye Samueli wacisile uli? Wamuneenyile ati: ‘Nga iuvwila Yeova.’ Uzye Saulo wasambilileko kuli vino waluvyanyizye?

Lino papisile insita, Saulo waile umu kulwa na Ina Amaleki, nupya Samueli waneenyile Saulo ukukoma antu yonsi. Nomba Saulo wasoolwilepo ukukanakoma Umwene Agagi. Yeova waneenyile Samueli ati: ‘Saulo watankana nupya wataata ukunguvwila.’ Samueli uvwile sana uyi, nupya waneenyile Saulo ati: ‘Pa mulandu wakuti watuuta ukuvwila Yeova, alasoolola umwene muze.’ Lino Samueli watenwike, Saulo wamulemile uku ca kuzwala nupya ica kuzwala cakwe Samueli calepwike. Lyene Samueli wanenyile Saulo ati: ‘Yeova watapoka uwene kuli wewe.’ Yeova wali nu kupeela uwene uku muntu uwamutemwa nupya aakamuvwila.