Itempele Lyakwe Yeova

Pa cisila cakuti Solomoni waya umwene wa Ina Izlaeli, Yeova wamuzizye ati: ‘I vyani vino ungatemwa nkupeele?’ Solomoni walanzile ati: ‘Nene umwance, ntamanyile ivyakucita. Napaapata mpeele amano pakuti natungulula ningo antu yako.’ Yeova nawe wamunenyile ati: ‘Pa mulandu wakuti walenga amano, ndalenga ukuti uye na mano ukucila antu yonsi amuno nsi. Nupya ndalenga ukuti uye umukama. Nga watwalilila ukunguvwila, ulikala amanda aingi.’

Solomoni watandike ukukuula itempele. Nupya waomvizye goldi umusuma sana, siuva, imbao alino na mawe. Aonsi na anaci aingi aamanyikisye imilimo yaomvile api tempele. Pa cisila ca myaka 7 yaamazile ukukuula itempele nupya yapekinye ukulipeela kuli Yeova. Api tempele pali ulambo uno iisilepo mawila. Solomoni wafukiime pa nkoleelo iya ulambo nu kupepa ati: ‘We Yeova, itempele lii, lisi likulu sana nupya lisi lisuma sana kuli wewe, nomba twapaapata upokelele ukupepa kwitu nupya uvwa mapepo itu.’ I vyani vino Yeova wacisile api tempele lino yamukuulile na pi pepo lino Solomoni wapefile? Lino Solomoni wamazile sile ukupepa, umoto wafumile ukwi yulu nu koca mawila aali pa ulambo. Yeova wapokelile itempele lino yamukuliile. Lino Aina Izlaeli yaweni vii, yaali sana ni nsansa.

Umwene Solomoni wamanyikwe umu Izlaeli monsi nu mu mpanga zyuze izya kutali pa mulandu na mano yano wakweti. Antu yayanga kuli Solomoni pakuti ayazwe pa ntazi zino yakwatanga. Na namwene kwene uwa ku Syeba waile umukumwezya na mauzyo akome. Lino uvwile vino Solomoni waswike walanzile ati: ‘Ntaataile vino antu yaneenyile pali wewe, nomba lyene nalola ukuti wakwata amano ukucila na vino yalanzile. Yeova Leza wako wakupaala.’ Ivintu vyazifile sana umu mpanga iya Izlaeli nupya antu yaali ni nsansa. Nomba ivintu vyali nu kusenuka.