Yeova Wakomizye Eliya

Yezebele uvwile ivyacitikile ya kasesema yakwe Baali nupya wasosile sana. Watumile amazwi kuli Eliya akuti: ‘Nawe kwene mutondo ulafwa wakwe vino ya kasesema yakwe Baali iyafwa. Eliya uvwile sana intete nupya wasimwilile uku lwanga. Wapefile kuli Yeova ati: ‘Yeova nemo natonta. Leka sile imfwe.’ Eliya watonsile sana icakuti waizi mwisika lya cimuti.

Malaika wamuzyuzile amuneena ati: ‘Katuka ulye.’ Eliya waweni umukate ukaye ala uli pa mawe na manzi aakumwa. Waliile amwa na manzi nga swilila umukulala. Nupya kwene malaika wamuzyuzile amuneena ati: ‘Katuka ulye. Ukulondekwa amaka aakuti upite ulendo uno ukweti.’ Nupya kwene Eliya waliile. Wapisile amanda 40, mpaka afika uku mwamba uwa Holebu. Kuku akuno Eliya waile alaala umu ciwina icali umu ciliwe. Lelo Yeova walanzile nawe. Wamuzizye ati: ‘Eliya, i cani cino ukucita kuno?’ Eliya nawe waswike ati: ‘Aina Izlaeli iyatama upangano wako. Yoonona maulambo yako nu kukoma ya kasesema yako. Lyene nani yakulonda ukunkoma.’

Yeova wamuneenyile ati: ‘Yanga kimilile pa mwamba. Ca kutandikilako, icimuza icikalamba cakatwike iciya icipita pa mulyango wa ciwina icali mu ciliwe. Palondelile icilundumusi lyene alino ipalondelela umoto. Nu mukusyalikizya, Eliya uvwile izwi iliteekele. Fwandi waivimvile icakuzwala cakwe uku manso nu kwimilila panzi. Lyene nupya kwene Yeova wamuzizye umulandu uno utukilanga. Eliya watile: ‘Aneene sile nasyalapo.’ Lelo Yeova wamunenyile ati: ‘Utasyala wenga. Kucili yauze 7,000 umu Izlaeli aacili yakampepa. Yanga ukasoolole Elisya uwa kukupyana pali ukasesema.’ Papo kwene sile Eliya waile acita vino Yeova wamuneenyile ukucita.’ Uzye ukwelenganya ukuti Yeova alakwazwa ndi cakuti ukucita vino akalonda ukuti uwacita? Ee, alakwazwa. Leka tulole vimwi ivyacitike lino kwali icilala.