Yosiya Watemilwe Masunde Yakwe Leza

Yosiya watandike ukuteeka umu Yuda ala ali ni myaka 8. Mu manda yaya, antu yacitanga ivya malele nupya yapepanga ivilubi. Lino Yosiya wali ni myaka 16, wasambilile inzila isuma iya kupepelamo Yeova. Lyene lino wali ni myaka 20, watandike ukonona ivilubi na maulambo umu mpanga yonsi. Nupya lino wali ni myaka 26, wapekinye ukuti yazifye itempele lyakwe Yeova.

Simapepo mukalamba Hilikiya, wazanyile ulupapulo umwi tempele umwali Masunde yakwe Yeova—ulupapulo luu limwi lungaya alulu luno Mose walemvile. Nupya Syafani kalemba watwazile ulupapulo lulo kuli Yosiya nu kutandika ukulubelenga umwi izwi lyuvwike. Lino Yosiya wakutikanga, wilwike ukuti antu yatuvwilanga Yeova pa myaka ingi. Umwene Yosiya waneenyile Hilikiya ati: ‘Yeova wasoka sana pali vino tukacita. Yanga kalande nawe. Nupya Yeova amatuneena vino tulinzile ukucita.’ Yeova waswike ukupitila muli Hulida kasesema umwanaci ati: ‘Antu ya mu Yuda yaamfutatila. Ndayafulula nomba ntalacita vivyo lino Yosiya acili umwene, pano wene wataicefya.’

Lino Yosiya uvwile amazwi yaa, waile ukwi tempele nu kwama antu yonsi aa mu Yuda. Lyene wabelengiile uluko lonsi masunde yakwe Yeova. Yosiya na antu yonsi yalavile ukuti yalaauvwila Yeova ni myenzo yao yonsi.

Uluko ulwa ya Yuda lutazevyanga Ucilo pa myaka ingi. Nomba lino Yosiya wabelenzile umu masunde ukuti yaalinzile ukuzevya Ucilo cila mwaka, waneenyile uluko ati: ‘Tulazevya Ucilo uwa kucindika Yeova.’ Lyene Yosiya wapekinye amalambo aingi nupya wapekinye ukuti api tempele paaya ya kiimba. Uluko lwazevizye Ucilo, nupya palondeliile ukuzevya ukwa Mukate Uwaula Icitutumusi, ukwacitike apa manda 7. Kutaatazile ikuya ukuzevya Ucilo ukwa musango uu kufuma umu manda yakwe Samueli. Umu cumi Yosiya watemilwe Masunde yakwe Leza. Uzye ukaipakizya ukusambilila pali Yeova?