Uwene Uwali Kwati Icimuti Cikulu

Wanda umwi usiku, Nebukadineza walosile iciloto icamutinyizye. Wamile antu yakwe aa mano kuti yamulondolwele upiliulo wa ciloto cakwe. Nomba pali yano wamile pasi uwakwanisye ukumulondolwela iciloto. Lyene umwene wasusile aneena Danieli.

Nebukadineza waneenyile Danieli ati: ‘Muciloto cane, inalola icimuti. Nupya icimuti cico icakula sana icakuti icafika nu mwi yulu. Alino icikuloleka uku yantu yonsi aa pano nsi. Icikweti amafwa asuma alino ni viseekwa ivingi. Inyama izikuuwa umwisika ilya cimuti cii, ni vyunyi navyo ivikupanga ivinsanzo ku cimuti kwene cii. Lyene malaika aali wika ukufuma ukwi yulu, nupya ali wapunda wati: “Temini icimuti ku mwi ni misambo yaciko. Lelo icisinte ni misila muvisye mu musili, alino uku cisinte cico munyepeleleko umusipi wa cela nu mukuwa. Nupya umwenzo wa cimuti ulasenulwa ukufuma umu mwenzo uwa muntu ukuya umwenzo uwa nyama, nupya pali nu kupita imyaka 7 kufuma pano cii cilacitikila. Antu yonsi yalamanya ukuti Leza ali Kateeka nupya angapeela uwene kuli wensi wino akulonda.”’

Yeova wasokolwile upiliulo wa ciloto kuli Danieli. Lino Danieli uvwikisye muno iciloto calozile, uvwile sana intete. Watiile: ‘Mwene, ngi cazipa iciloto cii icalanda pa yalwani yako, nomba cikulanda pali wewe. Cimuti cikulu cino iyatema a wewe. Ulafuma pa wene, nupya ulatandika ukulya isote kwati inyama iya mu mpanga. Nomba pa mulandu wakuti malaika iwalanda ukuti cisinte ni misila visyale, ulatandika ukuteeka nupya kwene.’

Lino papisile umwaka, Nebukadineza wapitanga api paala li sano lyakwe ala akulola vino umusumba uwa Babiloni wali usuma. Watiile; ‘Lolini musumba ukulu uno nakuula. Silolini maka yano nakwata.’ Lino atali amale ukulanda amazwi yaa, izwi lyafumile ukwi yulu nu kulanda iliti: ‘Nebukadineza! Lyene wapokwa uwene.’

Papo kwene sile amelenganyo yakwe Nebukadineza yasenwike aya kwati inyama iya mu mpanga. Wapatikiziwe ukufuma umwi sano lyakwe nu kuya ikala ni inyama izya mu mpanga. Inyele zyakwe Nebukadineza zyakuzile iziya kwati a mavumbu ya cunyi cikulu sana, ni ingala zyakwe nazyo kwene zyakuzile iziya kwati izya vyunyi.

Lino papisile imyaka 7, Nebukadineza wizile aya ningo nupya, fwandi Yeova wamwisile ukuya umwene uwa mu Babiloni. Lyene Nebukadineza watiile: ‘Nkulumbanya Yeova Umwene uwa mwi yulu. Lyene namanya ukuti Yeova ali Kateeka. Akacefya yayo aaya ni cilumba, nupya angapeela uwene kuli wensi wino akulonda.’