Yesu Waya A Mesiya

Yoani wasambilizyanga ati: ‘Umwi aancizile akwiza.’ Lino Yesu wali ni myaka 30, wafumile uku Galili nu kuya uku Luzi Ulwa Yodani, kuno Yoani wabatizizyanga antu. Yesu walondanga ukuti Yoani amubatizye, nomba Yoani watiile: ‘Ntalinzile uku kubatizya. Wewe ulinzile ukumbatizya.’ Yesu waneenyile Yoani ati: ‘Yeova akulonda ukuti wewe umbatizye.’ Fwandi yaile umu Luzi Ulwa Yodani, nupya Yoani watuwizye umwili onsi wakwe Yesu umu manzi.

Lino Yesu wafumile umu manzi, wapefile. Pa nsita kwene iya, iyulu lyayulike, nu mupasi wakwe Leza wizile pali aliwe umu musango wa nkunda. Lyene izwi lyakwe Yeova lyuvwisile ukufuma ukwi yulu iliti: “Wewe Umwanane wino natemwa, nkazangila muli wewe.”

Lino umupasi wakwe Leza wizile pali Yesu, ali lino wizile aya Klistu nanti Mesiya. Lyene wali nu kutandika ukuomba umulimo uno Yeova wamutumiile pano nsi.

Pa cisila sile ica kubatiziwa, Yesu waile umu lwanga nupya waile amalamo amanda 40. Lino wawezile ukufuma umu lwanga, waile umu kulola Yoani. Lino Yesu wapalamile, Yoani walanzile ati: ‘Wii Umwana uwa Mfwele wakwe Leza wino alafumyapo imembu izya yantu.’ Vino Yoani walanzile, vyalenzile antu yamanye ukuti Yesu wali a Mesiya. Uzye utumanya ivyacitikiile Yesu lino wali umu lwanga? Leka tulole.