Yesu Wacita Ivizungusyo Ivingi

Yesu wizile pano nsi umu kusimikila ilyasi lisuma pa Wene wakwe Leza. Pakuti Yeova alangilile vino Yesu alacita lino alateeka insi, wamupeezile amaka aakucita ivizungusyo. Wapozyanga imisango yonsi iya ndwala. Konsi kuno waya, alwale yayanga kuli aliwe kuti ayazwe, nawe wayapozyanga. Impafu zyalolanga, ya cipuuli yuvwanga, ivite vyapitanga, na yayo akweti iviwa yapoziwanga. Nanti sile yalema insenkebele zya cakuzwala cakwe yapolanga. Antu yalondelanga Yesu konsi kuno waya. Na lino walondanga ukuya wenga, Yesu atatazile azinga umuntu ali wensi.

Pa nsita imwi antu yatwazile umonsi umwi uwali icite uku ng’anda kuno Yesu wikalanga. Mu ng’anda mwali antu aingi sana icakuti yafizilwe ukumwingizya. Fwandi yatulwile icipongo api paala ukulingana na pano Yesu wayelile apano yamwingizizya. Lyene Yesu waneenyile umonsi wiya ati: ‘Katuka uwapita.’ Lino wakatwike, antu yazungwike sana.

Pa nsita yuze ala Yesu akwingila umu muzi, aonsi 10 aalwile tembwe imilile akatalamukila, nu kumupundilila iyati: ‘Yesu, twazwe!’ Umu manda yaya, antu aalwile tembwe yatazumiliziwe ukupalamila antu yauze. Yesu waneenyile aonsi yaa ukuya ukwi tempele, wakwe vino Isunde lyakwe Yeova lyalanzile ukuti avino umulwale tembwe alinzile ukucita nga wapola. Lino yacili umu nzila, yapozile. Nupya lino wenga pali yaya aalwile tembwe waweni ukuti wapola, waswilile umu kutaizya Yesu nu kulumbanya Leza. Alino apa yantu 10, wikwene sile u waswilile umu kutaizya Yesu.

Umwanaci umwi uwalwile apa myaka 12 walondesyanga ukupola. Fwandi umwanaci wii wapisile umwi iumba nu kuyalema uku nsenkebele izya cakuzwala cakwe Yesu. Papo kwene sile, wapozile. Lino cii cacitike, Yesu uzizye ati: “A weni wandema?” Nanti icakuti uvwile intete, umwanaci wii waile kuli Yesu nu kumuneena icisinka. Pakuti Yesu amutekezye, wamuneenyile ati: “Mwana we! upite ningo.”

Yailo nawe wapaapasile Yesu ati: ‘Iza uku ng’anda ukwane. Umwanane watalwala sana.’ Nomba lino Yesu atali afike uku ng’anda yakwe Yailo, umwana wafwile. Lino Yesu wafisile wazanyile ukuti antu aingi iyaya umu kulosezya pamwi nu lupwa. Yesu wayaneenyile ati: ‘Mutaalila, umwana atafwile, watakasula sile.’ Lyene walemile ikasa lya mwana wii nu kulanda ati: “Mwana we, katuka!’’ Papo kwene sile wakatwike, nupya Yesu waneenyile avyazi ukuti yapekanyizizye umwana vimwi ivyakuti alye. Uzye ukwelenganya ukuti avyazi yakwe yuvwile uli?