Yesu Wafwila pa Ncende Iya Gologota

Intunguluzi zyakwe ya simapepo zyasenzile Yesu ukwi sano lyakwe kateeka. Pilato wayuzizye ati: ‘U mulandu ci uno imupeela umuntu wii?’ Nayo yatiile: ‘Akalanda ukuti u mwene.’ Lyene Pilato uzizye Yesu ati: “Uzye wewe Umwene wa Yayuda?” Yesu nawe waswike ati: “Uwene wane usi wa pano nsi.”

Lyene Pilato waneenyile antu ukuti yasende Yesu kuli Helodi pakuti akalole ndi cakuti Yesu akweti umulandu. Helodi atazanyile Yesu nu mulandu uli onsi, fwandi wamuswilizye kuli Pilato. Lyene Pilato waneenyile antu ati: ‘Nemo na Helodi tutazanyile umulandu uli onsi mu muntu wii. Nimamuleka apita.’ Antu nayo yapunzile iyati: Mukomini! Mukomini! Asilika yatozile swepu iyacapa Yesu, yamuswila amati, nu kumuma. Yamuzwisile cisote ca myunga uku mutwe nu kutandika ukumutumfya iyati: Uli uli, Mwene wa Yayuda.’ Nupya kwene Pilato waneenyile antu ati: ‘Nemo umuntu wii ntamuzanyile nu mulandu.’ Lelo yene yapunzile iyati: “Apoopelwe pa cimuti!” Fwandi Pilato wayaneenyile ukuti yakamukome.

Yamusenzile uku ncende ino yamanga ukuti Gologota nupya yamupopiile pa cimuti nu kucimika. Yesu wapefile ati: ‘Tata uyeleele pano yatamanyile vino yakucita.’ Antu yatandike ukuseka Yesu iyati: ‘Nga wewe Mwana wakwe Leza, ika pa cimuti! Ipususye wemwineco.’

Wenga pa vipondo vino yapopiile pamwi na Yesu watiile: “Ukanjiusye lino ulaateeka umu Wene wako.” Yesu wamulavile ati: “Ulaya nani umu Paladaise.” Akasanya kwizile ikuya imfinzi pa maawazi yatatu iyakumiine impanga yonsi. Asambi yamwi na Maliya nyina wakwe Yesu yaile imilila umupiipi ni cimuti pano Yesu wapopiilwe. Yesu waneenyile Yoani ukuti asakamala Maliya kwati sile anyina.

Mukusyalikizya, Yesu walanzile ati: “Casila!” Nupya winime nu kufwa afwa. Pa nsita kwene ii, kwizile icilundumusi cikulu. Iketani ilya mwi tempele ilyalekinye Umwa Muzilo nu Mwa Muzilo Sana lyalepwike pakasi. Umukalamba wa yasilika walanzile ati: ‘Icumi kwene wii, u Mwana wakwe Leza.’