MWAPANGA ASAMBI
SAMBILILO 10
Mwaazwa Yauze Ukuya Asambi
Cisinte ci sunde: “Twalondesyanga ukumusimikila ilyasi lisuma pali Leza alino nu kupeela maumi itu pakuti tumwavwe, pa mulandu wakuti mwizile imuya atemwikwe sana kuli sweswe.”—1 Tesa. 2:8.
Vino Yesu Wacisile
1. Tambini VIDYO nanti belengini Yoani 3:1, 2. Alino mwasuke mauzyo alondelelapo:
Uzye mukwelenganya ukuti icani calenzile Nikodemasi atandalile Yesu usiku?
Uzye vino Yesu watandike ukulanzyanya na Nikodemasi usiku, vikalangilila uli ukuti walondanga ukupanga asambi?
I Vyani Vino Tukusambilila Kuli Vino Yesu Wacisile?
2. Tukalanga ukuti twatemwa antu ndi cakuti tukulondesya ukuyazwa ukuya asambi.
Mwakolanya Yesu
3. Mwasambilila nu musambi pa nsita ni cifulo vingamuzipila. Limwi angatemwa kulasambilila pa wanda uli umwi ni nsita ii imwi mu mulungu. Uzye limwi angatemwa ukuti mwasambilila nawe lino ali ku ncito, lino ali ku ng’anda, nanti ukuli antu aingi? Mwaezya na maka kusenulako vino mwatantika pa kuti mwasambilila nu musambi pa nsita ni cifulo ivingamuzipila.
4. Mwamusambilizya lyonsi. Ndi cakuti mulafumapo mutanena umusambi ukuti mutalasambilila umulungu uo. Lelo mungelenganya pali vii:
Uzye mungamusambilizya pa nsita yuze umulungu kwene uo?
Uzye mungasambilila nawe ukuomvya foni, zoom nanti vyuze ivikolineko?
Uzye munganenako kasimikila muze ukuti akatungulule isambililo?
5. Mwapepa kuli Yeova pa kuti amwazwa ukwika mano uku visuma. Mwapepa kuli Yeova ukuti mutatoovoka ukusambilila nu musambi nanti cakuti asilonda ukusambilila lyonsi nati asi omvya zuwa vino akusambilila. (Filipi 2:13) Umusambi winu afwile wakwata imiyele iingi isuma, fwandi mwapepa ukuti Leza amwazwa ukwika mano kumiyele kwene iyo.