Mwasambilizya Umu Nzila Iyangupale

Vino Yesu Wacisile

VIDYO: Yesu Watulangilila Vino Tata Witu Akatusakamala

1. Tambini VIDYO, nanti belengini Mateo 6:25-27. Alino mwasuke mauzyo alondelelapo:

1. Uzye Yesu watulangilile uli vino Yeova akatusakamala?

2. Nanti cakuti Yesu wamanyile ivingi pa tunyi, Uzye icisinka ci cicindame nupya icangupale cino wisileko sana amano? U mulandu ci uno ii yayelile inzila isuma iyakusambilizizyamo?

I Vyani Vino Tukusambilila Kuli Vino Yesu Wacisile?

2. Ndi cakuti tukusambilizya umu nzila iyangupale, antu yalaiusya vino tukuyasambilizya nupya tulayafika pa mwenzo.

Mwakolanya Yesu

3. Mutalandapo sana. Ukucila ukulanda pa visinka vyonsi vino mumanyile api lyasi lilyo, mwaika amano uku vyeo ivili umwi sambililo. Lino muzya iuzyo, mwateeka umwenzo lino mukulolela umusambi asuke. Ndi cakuti atamanyile icasuko nanti nga wasuka ivisikuvwana na vino Baibo ikasambilizya, mwamuzya umu nzila yuze pakuti mumwazwe ukwelenganyapo. Ndi cakuti umusambi uvwa icisinka cikalamba, mwaya pa cisinka cuze.

4. Mwaomvya vino umusambi wamanya mpiti pa kumwazwa ukumanya ivisinka ivipya. Wakwe, lino mutatala mwatandika isambililo ilikalanda pa kutuutuluka, mungapituluka panono nu musambi pali vino wasambilila pa yantu afwe.

5. Mwaomvya ningo ivilangililo. Lino mutatala maomvya icilangililo, mwayuzya muti:

1. ‘Uzye icilangililo cii icangupale?’

2. ‘Uzye umusambi amauvwikisya?’

3. ‘Uzye cimaazwa umusambi ukulaisya icisinka icikalamba ukucila ukulaiusya sile icilangililo?’