UKWASUKA MAUZYO AMULI BAIBO

Uzye ana yangasambilila uli ukutemwa Leza?

Ana inu yangasambilila ukutemwa Leza ndi cakuti yasininkizya ukuti i cumicumi Leza akuno waya nupya wayatemwa. Pakuti yatemwe Leza, yalinzile ukumumanya. (1 Yoane 4:8) Yalinzile ukumanya ivintu vii: Uzye u mulandu ci uno Leza waumbiile antunze? U mulandu ci uno Leza walekela sile ukuti antu yaacula? Uzye i vyani vino Leza alacitila antunze ukunkoleelo?—Welengini Filipi 1:9.

Pakuti mwazwe ana inu ukutemwa Leza, mulinzile ukulanga ana inu ukuti namwe mwatemwa Leza. Ndi yailolela ukuti mwatemwa Leza, yalaalondesya ukukolanya mwemwe.—Welengini Malango 6:5-7; Mapinda 22:6.

Uzye mungazwa uli ana inu ukuvwikisya vino mukuyasambilizya?

Izwi Lyakwe Leza lyaya na maka. (Ayebulai 4:12) Fwandi mwa-azwa ana inu ukumanya masambilizyo ya muli Baibo aangupale. Pakuti Yesu avwe antu ukuvwikisya vino wayasambilizyanga, waomvyanga amauzyo, wasumbanga amano kuli vino antu yalandanga, nupya walondololanga Amalembelo. Pakuti namwe mwa-azwa ana inu ukuvwikisya vino mukuyasambilizya, mwakolanya vino Yesu wasambilizyanga.—Welengini Luka 24:15-19, 27, 32.

Vyuze ivingavwa ana inu ukumanya Leza nu kumutemwa, a malyasi aaya muli Baibo aakalanda pali vino Leza waombanga nantu aaliko mpiti. Impapulo izyapangwa ukwazwa ukusambilizya ana zyaya pa www.jw.org.—Welengini 2 Timoti 3:16.

Pakuti mumanyilepo navyuze, lolini cipande 14 umwibuku lii,Uzye Baibo Ikasambilizya Ukuti Uli?, ilyapangwa na ya Nte Yakwe Yeova

Mungaliwelenga na pa www.jw.org, nanti mungalenga ukuomvya adelesi wenga apifwa 2 kuti yakamutumile ibuku kwene lii uwila sile

[Cikope apifwa 32]

Mwaomvya amasambililo aakalanda pa uumbo ukwazwa ana inu ukumanya Leza nu kumutemwa