UKWASUKA MAUZYO AMULI BAIBO
Uzye afwe yalaya nu umi nupya?
Icumi kwene Kaumba wa umi angatutulula antu afwa
Yeova Leza ali Ntulo ya umi. (Masamu 36:9) Uzye fwandi citanga ciye ningo ukulanda ukuti Leza kwene aliwe angatutuulula yonsi aafwa? Baibo ikatunena ukuti vivyo kwene ali vino Leza ali nu kucita uku nkoleelo. (Welengini Milimo 24:15) Nomba u mulandu ci uno alacitila vivyo?
Kufuma sile na mpiti, Kaumba witu walondanga ukuti antu yaikala pano nsi amanda pe. (Utandiko 1:31; 2:15-17) Na ndakai kwene avino akalonda. Akauvwa uyi sana ndi walola vino swe yantunze tukacuula alino na vino tukaafwa zuwa.—Welengini Yobo 14:1, 14, 15.
Uzye aekwi kuno antu aalatutuuluka yalaikala?
Uzye Leza waumvile antu ukuti yaikala ukwiyulu? Awe. Leza waumvile sile angeli ukuti aliyo yaikala ukwiyulu. Antunze yene wayaumvile ukuti yaikala pano nsi. (Utandiko 1:28; Yobo 38:4, 7) Fwandi lyene, elenganyini pa yantu yano Yesu watuutulwile. Lino wayatutulwile, yatwalilile ukuya pano nsi kwene. Fwandi vikwene ali vino cilaya nu ku yantu yano yalatutuluka uku nkoleelo, yalikala pano nsi kwene.—Welengini Yoane 5:28, 29; 11:44.
Lelo, Leza wasoolola sile antu anono aalatuutulukila ukwiyulu aalakwata imiili ino angeli yakwata. (Luka 12:32; 1 Kolinto 15:49, 50) Yonsi aalatuutulukila ukwiyulu yalaya aene na Klistu aalateeka antu aalikala pano nsi.—Welengini Umbwilo 5:9, 10.