Vino Mungacita Pakuti Mwauvwikisya Ivyaya Muli Baibo

Elenganyini ukuti muli uku mpanga ino mutatala mwayako. Lyene mwazana antu yano mutayelezyanya nayo, mwazana ivyakulya vino mutaamanya, ni ntambi kwene zino mwazana uku mpanga iiyo mutazimanya. Kwene, limwi munguuvwa uyi sana.

Limwi vikwene ali vino munguvwa pa muku wa kutandikilapo ukuwelenga Baibo. Cingaya kwati mwaya uku mpanga imwi iyaliko mpiti. Lyene uku mpanga iiyo mwazana antu aaka-amwa ukuti aina Filisti, nanti limwi mwazana antu akwata lutambi lwa ‘kulepola ivyakuzwala’ vyao, nanti limwi mwazana ivyakulya vino yaka-ama ukuti mana. (Kufuma 16:31; Yoswa 13:2; 2 Samueli 3:31) Cumi kwene ukulola ivintu vivyo cingamipezya mano. Ndi cakuti muli uku mpanga ino mutamanya ningo, uzye mutanga muvwe ningo ukukwata umuntu angamulondolwela vino ivintu vyaya uku mpanga iiyo?

ICAVWILE ANTU YAMPITI UKUVWIKISYA MALEMBELO

Kufuma sile lino mabuku yamuzilo yaatandike ukulembwa ukucila pa myaka 3,500 iyapitapo, kwali mapekanyo asuma aakwazwa antu ukuvwikisya ivyalembwa umu mabuku yamuzilo. Uku ina Izlaeli, intunguluzi yao iyakutandikilapo Mose, u “watandike ukuyalondolwela” ivyalemvilwe umu malembelo.—Malango 1:5.

Pacisila ca myaka 1,000, kwali antu na yauze amanyikisye sana Malembelo aavwanga antu ukuti nayo yauvwikisya. Umu 455 B.C.E., iumba ilikulu cuze ilya ya Yuda, apali na ance aingi sana, lyalongine capamwi umu musumba wa Yelusalemu. Antu aamanyikisye sana ivyalembwa muli Baibo ‘yawelengelanga antu’ ivyali umu lupapulo lwa masunde. Lelo kwali navyuze vino yacisile. “Yalondolwelanga antu Lupapulo lwa Masunde yakwe Leza, apakuti yanguvwa muno lwalola.”—Neemiya 8:1-8.

Lino papisile imyaka 500, Yesu nawe kwene watandika ukuombako umulimo kwene uu uwa kusambilizya antu. Nupya wene antu aingi yamumanyile ukuti wali a kasambilizya. (Yoane 13:13) Wasambilizyanga antu umu maumba aakulu cuze nupya wasambilizyanga na aali wenga. Insita imwi walanzile ni iumba ilikulu ilya yantu, umwilyasi ilyamanyikwa ukuti Lyasi Lya pa Mwamba cakuti maumba yatandike nu kuzunguka “imisambilizizye yakwe.” (Mateo 5:1, 2; 7:28) Umu mwaka wa 33 C.E., Yesu wavwanzile uku yasambi yakwe yaili ala yakupita umu museo yakuya uku kamuzi kamwi umupipi nu ku Yelusalemu, ‘wayalondolwelile ningo Malembelo.’—Luka 24:13-15, 27, 32.

Asambi yakwe Yesu nayo kwene yaavwanga antu ukuvwikisya sana Izwi Lyakwe Leza. Insita imwi, umuntu umwi uwa ku Etiopia uwali umucindikwe sana umu uteeko, wawelenganga amazwi yamwi amu Malembelo. Lyene umusambi Filipo aaya kunoli nu kumuzya ati: “Uzye ukuvwa vino ukuwelenga?” Umwina Etiopia nawe aasuka ati: “Uzye ningamanya uli, suka umwi wandondolwela?” Lyene Filipo watandike ukumulondolwela ningo upiliulo wa vyeo vino wawelenganga.—Milimo 8:27-35.

IVINGAMWAVWA NDAKAI UKUVWIKISYA IVYAYA MULI BAIBO

Wakwe vivi kwene vino mpiti kwali antu asambilizyanga auze ivyaya muli Baibo, na ndakai kwene ya Nte yakwe Yeova umu mpanga 239 yakasambilizya antu Baibo. (Mateo 28:19, 20) Cila mulungu yaakaavwa antu ukucila pali 9 milyoni ukuvwikisya ivyaya muli Baibo. Aingi yano yakasambilizya Baibo yakafuma umu mipepele isi ya Ina Klistu. Yakasambilizya uwila sile apa ng’anda ya muntu kwene wino yakusambilizya nanti kuuze kuno angatemwa. Yamwi nayo yakauvwa ningo ukusambilila Baibo ukuomvya foni nanti kompyuta.

Mukwai muce mulandeko na Nte Wakwe Yeova ali wensi pakuti mukamanyilepo ivingi pa kusambilila Baibo. Mulamanya ukuti fwandi munguvwikisya ivyaya muli Baibo, nupya amazwi ayamo “yakaomviwa mu kusambilizya cumi, kukanya kuluvyanya, kulungika kuluvyanya nga nu kupeela utunguluzi ku antu pakuti umuntu wino akatumikila Leza angalingana kucita misango yonsi ya vicitwa visuma.”—2 Timoti 3:16, 17.