Nga Mwalinganya Alino Mungamanya Icisinka

UZYE mwemwe Ina Klistu? Nga avino cili ale mwaya pa yantu aacila pali 2 bilyoni pano nsi aakati alondezi yakwe Klistu. Ndakai kwaya maceici aingi cuze aakati a Ina Klistu, nomba yatalemenkana pano yakasambilizya ivipusane-pusane nupya yasicita ivili vimwi. Fwandi vino mwemo mwazumilamo vingapusana na vino yauze aakati a Ina Klistu yazumila. Uzye upusano uu ufwile ukumusakamika? Ee, pano ala mukulonda ukuya Aina Klistu ukulingana na vino Baibo ikasambilizya.

Alondezi akutampilapo yakwe Klistu yayamanga yakuti “Aina Klistu.” (Milimo 11:26) Umu manda yaya kwali sile iuvi lyonga ilya Ina Klistu, fwandi yatalinzile ukukwata mazina na yauze. Aina Klistu yalondelanga vino Yesu Klistu Katandika wi uvi lya Ina Klistu, wasambilizyanga. Ngu ku ceici ku mwinu kwaya uli? Uzye mwazumila ukuti yakasambilizya vino Klistu wasambilizyanga na vino alondezi ya kutandikilapo yazumiile? Uzye mungamanya uli nga mukasambilila icumi? Kwaya sile inzila yonga iya kumanyilamo, mufwile ukuomvya Baibo pakuti mumanye.

Elenganyini pali cii: Yesu Klistu wacindike sana Baibo pano Izwi Lyakwe Leza. Atatemilwe antu aatalondelanga ivyalembwa muli Baibo lelo aisile amano ku ntambi zya yantu. (Mako 7:9-13) Fwandi tungati, alondezi yakwe Yesu yafwile ukulondela ivyaya muli Baibo. Acino Umwina Klistu wensi afwile ukwelenganya api uzyo lyakuti, ‘Uzye vino tukasambilila uku ceici vyalembwa muli Baibo?’ Pa kwasuka iuzyo lii, cingazipa ukulinganya vino yakasambilizya uku ceici ku mwinu na vino Baibo yalanda.

Yesu watiile tufwile twapepa Leza umu cumi, nupya icumi kwene cico tukacizana muli Baibo. (Yoane 4:24; 17:17) Mutumwa Paulo walanzile ukuti nga tukulonda tuce tutuulwe, tufwile “kumanya cumi.” (1 Timoti 2:4) Fwandi ali cino vyonsi vino twazumila vifwile ukufuma muli Baibo pakuti viye ivya cumi. Ndi cakuti vitakufuma muli Baibo ala tutanga tupusuke!

VINO TUNGALINGANYA VINO TWAZUMILA NI VYAAYA MULI BAIBO

Mukwai welengini mauzyo 6 aali umu cipande cii mulole na vino Baibo ikaasuka mauzyo kwene yaa. Muwelenge malembelo aalipo muli Baibo nupya mwelenganyepo sana apa masuko. Lyene mwelenganye muti, ‘Uzye vino yakasambilizya uku ceici ku mwitu ivilingana na vino Baibo yalanda?’

Amauzyo kwene yaa anono yamamwavwa ukumanya icisinka. Uzye mungatemwa ukulinganya ivisambilizyo na vyuze vino yakasambilizya uku ceici ku mwinu ni vyalembwa mu Baibo? Ya Nte Yakwe Yeova yangatemwa sana ukwizamwavwa ukumanya icumi icaya muli Baibo. Uzye citanga ciziipe ukuti mwasambilila Baibo uwila na Nte umwi? Nanti mungaya pa webusaiti itu iya jw.org.

1 IUZYO: Uzye Leza wa cumi a weni?

CASUKO: Yeova, Isi wakwe Yesu, ali Leza wa manda pe nupya uwa maka yonsi, Kaumba uwa vintu vyonsi.

VINO BAIBO YALANDA AEVI:

“Lyonsi lino tukamupepela, swemo tukataizya Leza Isi wa Mwene witu Yesu Klistu.”—Kolose 1:3.

“We Mwene Leza witu! Wemo wazipilwa kupelwa lulumbi, mucinzi na maka, pano wewe waumvile vintu vyonsi.”—Umbwilo 4:11.

Mulole na Loma 10:13; 1 Timoti 1:17.

2 IUZYO: Uzye Yesu Klistu a weni?

CASUKO: Yesu iiyeli lyakwe Leza. Yesu waumvilwe sile, fwandi wene wakwata intandikilo. Yesu akatontela Leza nupya akacita vyonsi vino Leza akalonda.

VINO BAIBO YALANDA AEVI:

“Tata andusile.”—Yoane 14:28.

“Klistu unkolanya wakwe Leza wino atangaloleka. Wene ali yeli lyakwe nupya alusile viumbwa vyonsi.”—Kolose 1:15.

Mulole na Mateo 26:39; 1 Kolinto 15:28.

3 IUZYO: Uzye umupasi wa muzilo i cani?

CASUKO: Umupasi wa muzilo a maka yano Leza akaomvya pakuti vino akulonda vicitike. Aasi muntu foo. Antu yangazuziwa nu mupasi wa muzilo nupya ungayapeela na maka.

VINO BAIBO YALANDA AEVI:

“Lyene walanga lino Elizabeti uvwa kulamuka kwakwe Maliya, umwana asukana umunda yakwe. Elizabeti nawe azuziwa nu mupasi wamuzilo.”—Luka 1:41.

“Lelo lino umupasi wamuzilo uliza panomuli, mulazuziwa na maka.”—Milimo 1:8.

Mulole na Utandiko 1:2; Milimo 2:1-4; 10:38.

4 IUZYO: Uzye Uwene Wakwe Leza i cani?

CASUKO: Uwene Wakwe Leza uuteko uwa kwi yulu. Yesu ali Mwene wa Wene Wakwe Leza. Uwene kwene uo wasya uce ulenge ukulonda kwakwe Leza kucitike pano nsi ponsi.

VINO BAIBO YALANDA AEVI:

“Nupya mungeli uwalenga cinimbali alizya ntandala yakwe, ngu mwiyulu muvwika mazwi akulu yati, ‘Ndakai akweti amaka akuteeka insi u Mwene witu na Katuula, nupya wene alateeka amanda pe.’”—Umbwilo 11:15.

Mulole na Danieli 2:44; Mateo 6:9, 10.

5 IUZYO: Uzye antu yonsi asuma yakaaya ukwi yulu?

CASUKO: Awe. Antu ya cumi sile anono, akaamwa ukuti “ufyo unono wa mfwele,” ali yano Leza wasoolola ukuya ukwi yulu. yalaateeka capamwi na Yesu lino alateeka antunze.

VINO BAIBO YALANDA AEVI:

“Mutoopa, mwe ufyo unono wa mfwele, pano So camuzanzya kuti amupeele Uwene wakwe.”—Luka 12:32.

“Yene yalaya yasimapepo yakwe Leza na yakwe Klistu, nupya yalateeka pamwi na Klistu.”—Umbwilo 20:6.

Mulole na Umbwilo 14:1, 3.

IUZYO: Uzye Leza akalonda ukuti insi ikaye uli?

CASUKO: Umu Wene Wakwe Leza, insi ilazipa cuze na antu ya cumi yalaikala ukwaula ukulwala, umu mutende, nupya yaliikala amanda pe.

VINO BAIBO YALANDA AEVI:

“Yao aicefya yalapyana impanga nu kusyukila ulongo ulumalilike.”—Masamu 37:10, 11.

“Wene alakumbula minsozi yonsi. Kutalaya imfwa nupya. Kutalaya kulosya nanti kulila, nanti kuvwa kuwaika. Vintu vyampiti vyati vipita.”—Umbwilo 21:3, 4.

Mulole na Masamu 37:29; 2 Petulo 3:13.