“Umulimo Uukulu”

IINSITA ya kukomaana kucindame sana umu Yelusalemu. Umwene Davidi watalaalika intunguluzi zyonsi izya mu wene wakwe, aomvi ya mu cilye, alino na onsi ya maka. Yali nu luzango sana ukuuvwa icakumanyisya iciyiyele. Yeova watapeela Solomoni mwana Davidi umulimo wa kukuula icikuulwa ca kupepelamo Leza wa cumi. Umwene wa ina Izlaeli uwa cikalamba watapokelela ivyeo vya kuomvya pa kukuula icikuulwa cico ukufuma kuli Leza nupya wapeela ivyeo vivyo kuli Solomoni. Davidi wavwanga wati, “Umulimo uukulu, pamulandu wakuti icikulwa cii i ca lulumbi. Ing’anda ii isi ya muntu, lelo iyakwe [Yeova] Leza.”—1 Mila. 28:1, 2, 6, 11, 12; 29:1.

Lyene Davidi uuzya icuzyo cakuti: ‘Lyene aweni namuze akasi ukupeela kuli [Yeova] apilelo?’ (1 Mila. 29:5) Uzye nga mwacisile uli imuyako? Uzye nga mwatungilile umulimo kwene uwo ukulu? Aina Izlaeli yacisilepo vimwi. I cumicumi antu “yazanzile cuze pa kupeela . . . mawila ya kuitemelwa, pano yapeelanga mawila ya kuitemelwa kuli Yeova nu mwenzi onsi.”—1 Mila. 29:9, NWT.

Imyaka iingi ukucisila, Yeova wapekinye cimwi icacindime sana ukuluta ing’anda ya kupepelamo. Wapekinye ing’anda ikulu iya kupepelamo iya unkolanya. (Ayeb. 9:11, 12) Uzye Yeova akaazwilizya uli antu ukuti yatandike ukuvwana nawe ndakai? Akacita vivyo ukupitila umu mulimo wa kupanga asambi. (Mate. 28:19, 20) Pa mulandu nu mulimo kwene uu, cila mwaka antu aingi cuze yakatandika ukusambilila Baibo, nupya asambi yamwi yakawatiziwa, nupya ivilongano ivipya vikapangwa.

Lyene, ukulunduluka kwa musango uu kukalenga kuti impapulo na zyuze izikalanda pali Baibo zyalondekwa kuti zipulintwe, nupya kukalondekwa ukukuula nu kusakamala ningo Amang’anda ya Wene, alino nu kulonda ivifulo vya kulonganilapo amaukongano yakalamba. Uzye musikuzumilizya ukuti umulimo witu uwa kusalanganya ilandwe lisuma uukulu nupya ukaleta ivintu ivisuma?—Mate. 24:14.

Ukutemwa Leza na antu yauze alino nu kusumba sana amano uku mulimo wa kusimikila pa Wene, i vikacincizya antu yakwe Leza ‘ukupeela kuli [Yeova]’ amawila ya kuitemelwa. Cikatuletela sana uluzango ‘ukucindika Yeova ni cuma citu’ nu kulola vino ivyuma vikuomviwa ningo pakuti umulimo ukulu cuze waombwa.—Mapi. 3:9.

Vino Yamwi Yakasangwilako Uku Mulimo Wa Mu Nsi Yonsi

Aingi ndakai yakapatulako ulupiya lumwi ulwakusangwilako uku mulimo wa mu nsi yonsi nu kwika umu kambokosi ka cilongano akaalembwapo ukuti “Umulimo wa mu Nsi Yonsi.” (1 Kol. 16:2) Cila mwezi, vilongano vikatuma umusangulo uu uku maofesi yakwe ya Nte Yakwe Yeova aaya umu mpanga yao. Mungatuma nu musangulo uku kaungwe akalembesiwa umwi sunde kano ya Nte Yakwe Yeova yakaomvya kuno mwikala. Pakuti mumanye izina lya kaungwe kaako, muyule pa webusaiti apa www.jw.org nu kutumila ukwi ofesi lyakwe ya Nte Yakwe Yeova ilyayela ukumwinu. Mungatuma imisangulo ii iyatilondololwa apisika:

IMISANGULO

Mungasangwilako ukuomvya kadi ya ku Banki. Umu mpanga zimwi yakasangwilako ukuomvya webusaiti iya jw.org nanti webusaiti yuze sile.
Mungasangwilako impiya, iviyembelo, nanti ivili vyonsi vino mwakwata. Mulinzile ukutumila pamwi na kalata wa kulondolola vino mwasangwilako ukuti yangaviomvya muno yakulondela.

IMISANGULO IYAKWATA IVYAKULONDELA

I misangulo ya mpiya ino mungalondolola ukuti yangamuwezezya nga mwalonda ukuziomvya ukunkolelo.
Mulinzile ukutumila pamwi na kalata muno imulondolola ivyakulondela pa musangulo uno mwatuma.

INZILA ZYUZE IZYA KUSANGWILAKO

Apisika itulondolola inzila zyuze zino mungaomvya pa kusangwilako pa kutungilila umulimo wa mu nsi yonsi. Lino mutatala mwasangula, mulinzile ukuuzya iofesi ilikaangalila umulimo wa kusimikila uku mpanga kuno mwayela nu kuuzya vino mungacita pa kuti musangwileko. Pano ivikalondekwa na masunde ya misonko vyapusana ukulingana ni mpanga kuno mwayela, fwandi mulinzile ukuuzya umuntu umwi uwamanya amasunde amu mpanga inu lino mutatala mwasangwilako.

Impiya izikasungwa: Ndi cakuti umuntu walembesya uku kampani ukuti yakamupeele impiya ndi vimwi vyamucitikila nanti ndi cakuti walembesya ukuti yakamupeele impiya ndi wafika pa musinku wa kuta incito ukulingana ni sunde lya uteeko, angasangwilako nu kulemba ukuti akaungwe akaalembesiwa umwi sunde kakwe ya Nte Yakwe Yeova kakapoke impiya zizyo.

Impiya izikasungilwa uku banki: Ukulingana ni vikalondekwa uku ncende ino mwayelako, mungalembesya uku banki ukuti impiya zino yalamupeela lino mwafika pa musinku wa kuta incito, nanti impiya zyuze izya kwiza omvya ukunkoleelo zikapeelwe uku kaungwe kakwe ya Nte Yakwe Yeova akaalembesiwa umwi sunde ndi mwafwa.

Cikuulwa nanti ncende: Ndi cakuti mwakwata icikulwa nanti incende vino mungakazya, mungasangwilako ukuomvya akaungwe kakwe ya Nte Yakwe Yeova akaalembesiwa umwi sunde. Ndi cakuti mucili mukwikala umu cikuulwa cico nanti pa ncende iiyo, mungatantika ukuti mutwalilile ukwikala kufikila lino mwafwa.

Impiya zino yakapeela pa mpela ya mwaka: Mungasangwilako uku kaungwe kakwe ya Nte Yakwe Yeova akaalembesiwa umwi sunde impiya zino mukapoka pa mpela ya mwaka kuno mukaomba, nu kulembesya ukuti mwapokako sile impiya zinono pa mpela ya mwaka lino mutali mufwe. Mungatandika ukupoka impiya izinono pa mpela ya mwaka kwene uno mwalembesya ukuti mumasangwilangako.

Ivyuma ivikasyala umwi ndi wafwa: Mungalembela limwi ukuti ivyuma vinu ivilasyala ndi mwafwa vikapeelwe uku kaungwe kakwe ya Nte Yakwe Yeova akaalembesiwa umwi sunde. Inzila ii yaaya ningo sana pano insita zimwi ingacefyanyako imisonko imwi iikalondekwa uku uteeko.

Ukulingana na vino amazwi yakuti “inzila zyuze izya kusangwilako” yakupiliula, imisangulo ya musango uu ikalondekwa ukuti aakusangwilako atantika ningo ivintu. Ivyeo na vyuze pali vino mungasangwilako uku mulimo wa mu nsi yonsi wakwe ya Nte Yakwe Yeova, mungavizana umu kabuku kamwi (Charitable Planning to Benefit Kingdom Service Worldwide) akaaya umu Cizungu nu mu Cispanish. Kabuku kaa kakalondolola inzila izipusane pusane zino umuntu angaomvya pa kusangwilako. Ivyeo ivyaya umu kabuku kaa, limwi vitanga vimukume sana apa mulandu na masunde pa vya misonko nanti masunde yauze aaya umu mpanga inu. Antu aingi yakaazwilizya ukutungilila umulimo wa mu nsi yonsi nupya ukuomvya inzila zii pa kusangwilako kwayazwa umu vya misonko. Ndi cakuti akabuku kaa amuno kaya umu mpanga inu, mungalenga kuli kalemba uwaya umu cilongano cinu ukuti amupeeleko akabuku kaa.

Pa kuti mumanyilepo na vyuze, soololini apakuti “Sangwiliniko ku Mulimo Witu” ndi mwayula jw.org nomba apisika, nanti mungatumila iofesi lyakwe ya Nte Yakwe Yeova ilyayela uku mwinu.