Vino Mungaipakizya Sana Ukuisambilizya Baibo

Yoswa akuwelenga Masunde; malinga ya musumba wa Yeliko yapona nupya ing’anda yakwe Leyabu yasyala ukwaula ukononeka; Yoswa wakatusya makasa umupela lino akupepa

YOSWA wakweti intazi ikulu sana. Wali nu kutungulula uluko lwa ina Izlaeli pakuti ingile umu Mpanga ya Ulayo nanti icakuti kwali amezyo aingi. Yeova wamunenyile ukuti wali nu kucimvya, nupya wamukomelizye ati: ‘Ule uposye nupya uzyansye. Utakezye kutazyela isunde nanti lyonga pali yayo. Lupapulo luu lwa masunde lulinzile lwawelengwa lyonsi pakuti mutekele pa kucita vyonsi vino vyalembwa mwenemo. Ndi caya vivyo, lyene mulaya nu longo nupya mutalaposiwa.’—Yoswa 1:7, 8.

Ndakai tukaikala umu “tusita tutale,” nupya tukakwata sana mezyo. (2 Tim. 3:1) Naswe tungacimvya ndi cakuti tukulondela ukupanda mano kuno Yeova wapeezile Yoswa. Tungaawelenga Baibo lyonsi nu kuomvya ivisinte ivyayamo lino twakomaana na mezyo.

Nomba sweingi tungazumila ukuti tusi yasambi yasuma nupya cikatutalila sana ukuisambilizya. Nomba vino ukuisambilizya Baibo kwacindama sana, pitulukini umu kambokosi akakuti “Ezyini Ukucita Vii” pakuti mulole vimwi vino mungacita pakuti mwaipakizya sana ukuisambilizya Baibo.

Kalemba wa masamu wimvile ukuti: “Umpeele ukuyela nu kuwaka amasunde yako, pano nemo ndazana uluzango.” (Masa. 119:35) Mungaya sana nu luzango ndi mukuisambilizya Izwi Lyakwe Leza. Mulazana icuma icisuma sana ndi cakuti mukulondelezya sana umwi zwi lyakwe Leza.

Nanti icakuti mutanga mutungulule uluko wakwe vino cali kuli Yoswa, namwe mwakwata intazi izikamuponela. Fwandi namwe mwaisambilizya wakwe Yoswa nu kulondela ivyalembwa muli Baibo pakuti vyamwazwa. Ndi mukucita vivyo, mutalaposiwa.

EZYINI UKUCITA VII

Pepini lino mutali mutandike ukuisambilizya. Muli Baibo mwaya amelenganyo yakwe Leza wa papelapela yano watulembiile pakuti ivyeo ivyayamo vyatwazwa. Fwandi lino mukuwelenga Baibo, mwamuleenga ukuti aamwazwa ukuomvya vino mukusambilila.—Ezila 7:10.
Mwayuzya mauzyo lino mukuwelenga Baibo nanti mpapulo izikalanda pali Baibo. Mungayuzya muti: ‘Uzye ivyeo vii vikunsambilizya vyani pali Yeova? Uzye vikuvwana uli na mazwi yonsi aaya muli Baibo? Uzye ningaomvya uli ivyeo kwene vii pa kwazwa yauze?’
Mwaelenganya sana pali vino mwasambilila. Mwatala imuta panono ukuwelenga pakuti mwelenganyepo. Mungayuzya mweineco muti: ‘Uzye ivyeo vii vyalenga nuvwe uli? U mulandu ci uno nuvwila vii? Uzye vikuvwana uli ni vyancitikila mpiti, ivikuncitikila ndakai, nanti vimwi ivingancitikila uku nkoleelo? Uzye ningaomvya uli vyeo vii ivya kunsunda?’ (Yobo 23:5; Masa. 49:3) Mwaezya ndi cakuti mungalondolola umulandu uno Yeova akatunenela ukutaluka uku vicitwa vimwi, nanti ukulondolola ivisuma ivingacitika pa mulandu nu kutaluka uku vintu vivyo.—Malan. 32:28, 29.
Mwaelenganya kwati akuno muli lino mukuwelenga pa malyasi aakalondolola vimwi. Uzye mungezya ukwelenganya kwati akuno muli lino aina yakwe Yosefu yakumukazya uku mulongo wa ina Isumeli? (Utan. 37:18-28) I vyani vino mukulola, ukuvwa, nu kununsya? Mwaezya ukwelenganya kwati mwemwe muli yantu yano ivintu vimwi vikucitikila. Uzye yakwelenganya pali vyani nupya yakuyuvwa uli? Ukwelenganya kwa musango uu kungalenga muvwikisye vino mukusambilila.
Mwaomvya iviombelo ivingamwazwa ukulondelezya ivyeo lino mukuisambilizya. Manyini ningo iviombelo ivyaya umu lulimi lwinu, ivyaya pa intaneti alino ni vya pulintwa. Mwauzya yauze ukuti yamwazwe ukumanya ivya kuomvya iviombelo vivyo ningo. Ibuku Ilya Kwazwa Inte Zyakwe Yeova Ukulondelezya Ivyeo lilamwazwa ukuzana ivyeo ivyaya umu malyasi aakalondolola ivikomo vimwi ivyaya muli Baibo. Mwaomvya ivyeo na vyuze ivyaya muli Baibo wa Malembelo ya Nsi Ipya ndi cakuti mwakwata umu lulimi luno mwamanya. Ivyeo vii vikaazwa sana ukumanya ivintu ivyali uku mpanga izipusane pusane, ulondolozi wa nsita lino vimwi vyacitiike, ivipimo ivikalanga ukunyoma kwa vintu vimwi nanti intamfu, alino na vyuze ivingi.
Pitulukini panono umu visinka ivya kumwazwa ukwiusya vino mwatimusambilila. Nupya mungaanenako na yauze vino mwasambilila. Uzye kuli vimwi vino mungaomvya umu mulimo wa kusimikila? Ndi mukucita vii, mutalaiusya sile ivyeo vii lelo mulaaviomvya ukwazwako na yauze.