Uusuma Ci Uwaya Mu Kumanya Leza?

Ukufika paa, itusambilila ivintu ivyakutwazwa ukuzana amasuko kwi uzyo lyakuti, Uzye Leza a weni? Twatandikilepo ukusambilila muli Baibo ukuti izina lyakwe a Yeova nu kuti imiyele icindame sana ino wakwata u kutemwa. Nupya itusambilila na vino wacita alino na vino alacitila antunze. Nanti i cakuti kucili ivingi vino mulinzile ukusambilila pali Leza, mungaelenganya umulandu uno kucita vivyo kwacindamila.

Yeova walaya ukuti ‘Ndi cakuti mwamulondalonda, mulamuzana.’ (1 Milandu 28:9) Mutale mwelenganye pa wila usuma cuze uno mulapokelela ndi mwalonda nu kumanya Leza, uwila uwo u kuya ya “cuza yakwe Yeova”! (Masamu 25:14, NWT.) Uzye ukuya cuza wakwe Yeova kungamwavwa uli?

Mungaya ni nsansa zya cumi. Yeova walondololwa ukuti a “Leza wa nsansa.” (1 Timoti 1:11, NWT.) Ndi mwapalama kuli aliwe nu kumukolanya mulaya ni nsansa zya cumi, izilalenga muye nu mutende, amelenganyo asuma alino nu umi usuma. (Masamu 33:12) Nupya mulaya ni nsansa mu umi ndi cakuti mukutaluka ivingonona imikalile inu, ukuya ni imiyele isuma alino nu kutwalilila ukuvwana na yauze. Mulazumila vino kalemba wa masamu walanzile ukuti: “Nemo natemwisya ukukupalamila, we Leza!”—Masamu 73:28.

Alamusakamala. Yeova walaya aomvi yakwe ukuti: “Namakuwakanga nu kukupanda mano.” (Masamu 32:8) Cico cikupiliula ukuti Yeova akasakamala aomvi yakwe wenga na wenga nupya akayapeela vyonsi ivikulondekwa. (Masamu 139:1, 2) Ndi cakuti mwaya sana ya cuza yakwe Yeova, mulamanya ukuti lyonsi akamusakamala.

Mulaya nu umi usuma ku nkoleelo. Ukulunda pa nsansa nu umi usuma vino Yeova wamupeela ndakai, alamwazwa nu kwizakwata umi usuma sana ku nkoleelo. (Ezaya 48:17, 18) Baibo ikati: “Umi wa pe uwakuti antu yamanye wewe, Leza wenga sile uwa cumi, nga nu kumanya Yesu Klistu wino watumile.” (Yoane 17:3) Mu manda ya atale, upaalilo uno Leza watupeela waya kwati inanga ikatwazwa ukuya akome.—Ayebulai 6:19.

Vii avinono sile pa milandu isuma ino tulinzile ukumanyila ningo Leza nu kuya ya cuza yakwe. Mwemwe yantungwa ukulanda na Nte Wakwe Yeova aliwensi nanti ukuya pa jw.org pakuti muzane ivyeo na vyuze ivingamwazwa.